New York, Jymmang:
Uwei u nong India u la shah bat noh hadien ba shah pharep don kti halor ka jingpyniap ia 3 ngut ki khynnah rit kiba leit ban leh kai ia ka bell iing hapoh ka iingsah jong u ha ka nongbah California jong ka United States.
Ia utei u briew la ithuh kum u Anurag Chandra, uba shong ha ki thaiñ jong ka Riverside County, ha kaba la shem daw sniew ia u pyrshah halor ka jingpyniap ia ki 3 ngut ki khynnah rit ha ka Sngi Thohdieng.
Katei ka jingjia ka la jia naduh ka 19 tarik u Kyllalyngkot jong u snem 2020, ha kaba kitei ki khynnah rit ki la leit ban pynriew kai ia ka bell iing jong ka jingkhang u Chandra hapdeng ka jing ia-shongshit para khynnah.
Hapdeng ka jingtohkit bniah ia u, u Chandra u la iathuh ba kitei ki khynnah ki thap ia u nadien ha ka por ba u plie ia ka jingkhang bad shuwa ba kin mareh bad phet noh bad katei ka jingbitar jong u, ka la pynlong ba un pyniap ia ki baroh 3 ngut. Kitei ki 3 ngut ki dei kiba dang ha ka rta ba 16 snem.
Shuh shuh ruh u Chandra u la phla ba ha katei ka miet, u la dep ban dih lypa ruh kumba 12 bilor ka ‘Beer’ bad na kane ka daw, um tip briew eiei shuh hynrei da ka jingbitar u la beh ia ka kali ba kitei ki khynnah ki shong bad phet krad na u, ha kaba u la ioh ban tynrah ia ka kali ba ki shong ha ka por ba ki poi ha Temescal Valley bad hadien ka jingïoh tynrah jong u, katei ka kali jongki ka la leit ban tynrah beit beit ia u dieng uba don mar pyrshah jongki ha katei ka surok.
Ki nongshong shnong jong katei ka jaka ki iathuh ba kitei ki khynnah ki la khlad noh tang hadien katto katne sngi jong katei ka jingleit tynrah jongki ia utei u dieng hapdeng ka jingphet iap jongki na utei u briew bad namar ka jingmynsaw ba la jur, baroh 3 ngut ki la khlad noh hapdeng ka jingsumar.
Hynrei, la sngewthuh ba utei u briew um shym mut ban tynrah khnang ia katei ka kali ba ki shong hynrei namar ka jingbuaid u la kum leit tynrah beit beit nadien hapdeng ka jingbeh thong jong u ia ki ha katei ka por.
Wat la katta, u Chandra u la iathuh ba u khlem sangeh hi ruh ia ka kali jong u wat haba u la iohi ba katei ka kali ba ki shong ka la leit rat ia utei u dieng namar um shym poi pyrkhat ba kin mynsaw ne ngat tyngeh.
La ong ba u nongñiah jong katei ka kali pat u dei uba la 18 snem ka rta bad u la lait im lang ryngkat bad uwei u khynnah 13 snem.
Namarkata, la ong ba u Chandra un hap ban shah bishar ha ka 14 tarik u Naitung bad la sngewthuh lypa ba un hap ban shong patok beit da kumno- kumno ruh namar la don lypa ruh ki jingjia bad ki dak sniew hapoh ka tnat pulit jong katei ka nongbah haba iadei bad kawei pat ka jingjia ha ka iing jong u ha ki por ba la leit.
Namar la ong ba katei ka jingiap jong kitei ki khynnah ka long ka bym poi pyrkhat bad ka bym lah ruh ban mutdur namar ka long tang na ka daw ka jingleit beh thong jong utei u briew ha ka por ba ki leit ban ñion kai ia ka bell iing jong u.
Namar hapdeng katei ka jingïalehkai shongshit hapdeng jongki, ki da kob iwei ia iwei lada don kat uba nud napdeng jongki ban leit ñion ia ka bell jong katei ka iing.
