Shillong, Jymmang 01:
Ka Hynñiewtrep Integrated Territorial Organisation (HITO) Sengkmie ka la pynpaw ïa ka jingsngewkhia halor ka shithi ba la phah da ka A’chik Conscious Holistically Integrated Krima (ACHIK) sha ka shlem treikam u Director Urban, u Bah E Kharmalki, IAS, halor ka jingpyrshah jong ka ha kaba ïadei bad ka jingthung kam ïa ki briew ki bym dei na ka jaidbynriew Garo.
Haba kren sha ki lad pathai khubor ha Shillong Press Club ha ka Lah Sngi U Blei ka 1 tarik u Jymmang 2023, u Bah Donbok Dkhar, President ka HITO u la ong ba katkum katei ka shithi la sngewthuh ba la thoh da ka ACHIK ka dei kaba ïalam bakla ïa ka ïingbishar bad ïa ka jaidbynriew hi baroh kawei.
“Katkum kane ka shithi, ka thoh ba 13 tylli ki post ki dei tang jong ki Garo, hynrei hadien ba ngi la wad ïa ki jingtip, kane ka 13 tylli ka dei bad ka ‘Interview’, ym dei tang kata ka Sanctioned Post, bad ka Vacant Post ka dei tang 2 tylli bad ka Sanctioned Post naduh 2019 ka dei 16 tylli kaba dei Khasi-Jaiñtia 4 tylli bad Garo ka dei 4 tylli bad kane ka Vacant Post kaba mynta 2 tylli kan dei ïa ki Garo,” la ong u Bah Donbok.
U la ong ba ka jingwanrah jong u ïa ka 2019 ka dei namar ba ha kato ka por ka ïingbishar kata ka High Court kam shym la bthah eiei. Hynrei, hadien kane kan sa wan ka jingbthah ba kan sa mih ba 13 ngut kiba la leit ïa ka Interview.
Shuh shuh u Bah Donbok u la ong ba ka jingleh jong ka ACHIK ka long kumba ka la ai ding bad ïalam bakla ïa ka jingpyntreikam ïa ka Roster System halor ka jingpynkhreh ban thungkam hapoh ka tnat Urban Affairs jong ka sorkar jylla. Kumta u Bah Donbok u la kyntu ïa ka seng ACHIK ba kam dei ban long ka nongwan ai ding khlem da tip ne wad bniah shwa ïa ka jingshisha.
“Katkum kane ka shithi, ngi la sngewthuh ba la thoh da ka ACHIK ka long kaba bakla bad kaba ïalam bakla ïa ka ïingbishar bad kaba ïalam bakla ïa ka jaidbynriew Hynñiewtrep. Kaei kaba ngi ïohi ka long ba kane ka ACHIK ka ai ding pynban halor ba ka la wan ban pyntreikam beaiñ ïa ka Roster hangne hapoh ka jylla ka jong ngi,” la ong u Bah Donbok.
