Shillong, Jymmang 01:
U MLA barim ka Mawlai, u Bah Process T Sawkmie, u la ong ba wat hapdeng ka jingshah kren beiñ ha kiwei ki seng saiñ hima sima kiba don hapoh ka jylla, ka seng UDP kan ïaid shakhmat ban trei na ka bynta ka roi ka par bad khamtam ïa ki mat jong ka jaidbynriew kan nym lah ban ïa peiñ.
U Bah Process u la ong, ba ka seng UDP, kawei na ki seng riewlum kaba heh hapoh ka jylla kaba don 11 ngut ki MLA hapoh ka ïingdorbar thawaiñ, ka sngewthuh ban rah ne kren ïa ki mat ha ki rynsan kiba kumno, ym ban shu leh shongshit shaba palat.
Ka UDP ka dang khlaiñ katba nang mih ki sngi, dei na kata ka daw ba ki paidbah ka Sohïong ki kyrshan tyngeh ïa u kyrtong ka UDP ban pynjop ïa u.
Ka seng ka ïeng ha ka nongrim ka jingïakren bad ka sorkar ne kiwei ki seng saiñ pyrthei, ym ban ïa beiñ ïa khoh ne ban ong, tang ka jong nga kaba biang tam.
