Hyderabad, Jymmang:
Ka khubor ba lah ioh lum ka iathuh ba ka khlur ialehkai Badminton ka ri kaba la rah ia ka nam lahduh na ka Commonwealth Games haduh arsien kynthih ka Saina Nehwal, kan ym shimbynta ha ka rynsan jied nongialehkai ka ri ka ban sa long na ka bynta ban jied ia ki nongialehkai kiba bitdor ban mihkhmat ia ka ri sha ka lympung Asian Games ka ban sa long shen. Kane ka dei na ka daw jong ka jingphikir ka jong ka ha kaba iadei bad ka jinglong jingman ka met ka phad bad ban ioh ruh ia ka jingkoit ba pura.
Shuh shuh ruh katkum ka khubor ka iathuh ba ka Badminton Association of India (BAI) kan sa pynlong ia kata ka rynsan ialehkai na ka bynta ka jingjied nongialehkai ka ri sha katei ka lympung ban wan, kan sa long naduh ka 4-7 tarik mynta u bnai ha Jwala Gutta Academy of Excellence ha Telangana. Katei ka lympung ialehkai kaba heh kan long ha Hangzhou, China naduh ka 23 tarik u Nailur haduh ka 8 tarik u Risaw. Ka sien kaba khatduh ha kaba ka Saina ka lah shimbynta ha ki lympung ialehkai ka long ha ka Orleans Masters bad katei ka nongialehkai ka lah iakhun ia ka jingshitom jong ka lah slem haduh ba kan hap ban kynran-dien noh na ka rynsan ialehkai jong ka Badminton Asia Mixed Team Championships ha u bnai K’lyngkot bad kaba lah duh ruh ban shimbynta ha ki rynsan pyrshang ialehkai na bynta ka CWG jong u snem ba lah dep. Na ka liang jong ka BAI ka lah dep ban jied bad pynrung beit ia kawei pat ka khlur ialehkai ba paw ka ri ka PV Sindhu, HS Prannoy, Chirag Shetty & Satwiksairaj Rankireddy bad ka Treesa Jolly & Gayatri Gopichand na ka bynta ban mihkhmat ia ka ri sha ka tei ka lympung ialehkai ban long ha Hangzhou bad ka jingjied jong ka ia ki ka long katkum ki kyrdan ba ki lah shong ha ka BWF Top 20 katkum ka 18 tarik jong u bnai ba lah dep. Na ka liang jong ka BAI ka iathuh ruh ba u Kidambi Srikanth bad Lakshya Sen, Priyanshu Rajawat, Mithun Manjunath bad B Sai Praneeth ki long napdeng kiwei pat ki nongialehkai na ka jingiakhun paramarwei kiba hap ban iakhun tyngeh ha katei ka rynsan jied nongialehkai ka ban sa long.
Na ka jingiakhun paramarwei ki kynthei, ka Aakarshi Kashyap, Malvika Bansod, Ashmita Chaliha, Unnati Hooda kin long napdeng ki thei iakhun paramarwei ki ban shimbynta ha ka rynsan. Kumba haduh lai ngut ki nongialehkai yn shah jied na ka bynta ka jingiakhun paramarwei ki shynrang bad kynthei ruh kumjuh katba arjur na ka kyrdan ialehkai ba mar shijur bad shijur na ka kyrdan iakhun para shynrang bad shi kynhun jong ka jingiakhun parakynthei yn sa jied ha ka tei ka rynsan jied nongialehkai ka ban long.
Ka thup kyrteng jong ki nongialehkai ki ban shimbynta ha katei ka rynsan na bynta ka Asian Games 2023 ki long:
Men’s Singles:Lakshya Sen, Kidambi Srikanth, Priyanshu Rajawat, Mithun Manjunath, Sai Praneeth, Maisnam Meiraba, Bharat Raghav, Ansal Yadav, Siddhant Gupta
Women’s Singles:Aakrshi Kashyap, Malvika Bansod, Ashmita Chaliha, Aditi Bhat, Unnati Hooda, Alisha Naik, Shriyanshi Valishetty, Anupama Upadhyay
Men’s Doubles: MR Arjun/Dhruv Kapila, Krishna Prasad/Vishuvardhan, Suraj Goala/Pruthvi Roy, Nithin HV/Sai Pratheek.
Women’s Doubles: Ashwini Bhat/Shikha Gautham, Tanisha Crasto/Ashwini Ponnappa, Radhika Sharma/Tanvi Sharma
Mixed Doubles: Rohan Kapoor/Sikki Reddy, Sai Pratheek/Tanisha Crasto, Hariharan/Varshini, Hemagendra Babu/Kanika Kanwal.
