Tashkent, Jymmang:
Uwei na ki nongialehkai Iakura ba lah kham tbit jong ka kynhun ialehkai ka ri u Mohammad Hussamuddin u la lah ban ialehkai bha naduh kaba sdang ha ka jingiaid lynti ka jong u ha ka lympung ialehkai kaba mynta ha Tashkent ka IBA Men’s World Boxing Championships da ka rukom iakura kaba khampher kaba u lah sei ha ka lympung na ka bynta ban khur shalade ia ka jingjop ba nyngkong.
Ha kaba iadei bad katei ka bynta jong ka jingjop ka jong u, utei u nongialehkai ka ri uba lah khur ia ka takma Rnong haduh arsien na ka Commonwealth Games u lah pynjai-jai ka rukom ialehkai ka jong u ha ka jingiakura pyrshah bad uba na Macedonia u Alen Rustemovski ha ka kylla iakhun kaba nyngkong tad haduh ba un da lah ban pyndep ia ka jingiakhun baroh kawei da 5-0 jingjop.
Da kaba pyndonkam bha ia ka bor jingkhlain ialehkai ka jong u bad kiwei pat ki lad iakura ba u don, u Hussamuddin u la lah ha ka ban kura ia u nongiakhun pyrshah da bunsien bad khur syndon shalade ia ka jingjop da ka jingrailang kawei da ki nongbishar ia ka jingiakhun ka jong ki.
Haba phai sha ka kyrdan iakura kiba ha ka jingkhia kaba 60kg, u Varinder Singh u lah mad noh ia ka jingshah pynrem ha ka jingiakura pyrshah bad uba na Uzbekistan u Mujibillo Tursunov bad mad ruh ia ka jingshah weng noh na ka lympung ialehkai hadien ba u Singh u lah shah pynbam da 0-5.
Katkum ka khubor ba lah ioh lum ka iathuh ba ka BFI mynta ka kynti ka la lah ban sei ia ki 13 ngut ki rangiakura ka ri na ka bynta ban ia aireng ha katei ka lympung ialehkai kaba dang iaid shakhmat mynta ia kaba lah wan ban shimbynta da ki 538 ngut ki nongiakura kynthup ia ki katto katne ngut ki nongkhur takma na ka lympung ialehkai Olympic na ki 107 tylli ki ri.
Kat haduh mynta, haduh 7 ngut ki rangiakura ka ri kiba la lah ban khur ia ki takma bapher bapher ha ka World Boxing Championships bad ki nongiakura ba tbit bad ba pawkhmat ka ri kin shim ia ka bynta na ka bynta ka jingnang iai pynbun ia ka jingdon ki nongialehkai ha ka kynhun ha ka bynta ba mynta jong ka lympung.
