Kyiv, Jymmang:
Katkum ki khubor la ong ba ka jingther ‘namding naphang jong ka Russia ha ki bynta bapher bapher jong ka Ukraine, ka la shim ia ka jingim jong 34 ngut ki nongshong shnong ka Ukraine ha ka phang pdeng jong ka Dnipropetrovsk kiba kynthup ia ki khyllung-khynnah.
Kane ka long hadien ka jingthombor ba rad bah jong ka Russia ha ka taiew ba la lah, bad kine ki jingthombor jong ka Russia ha kane ka por ki long ruh hadien ba ka Russia ka la sdang ban kham pyn jaijai ia ka jingleit hiar thma kaba jur sha Ukraine naduh ba ka la dep hiar thma dusmon ha ki bnai tlang bad kaba la pynjot bad pynjulor ia ki shlem treikam bapher jong ka Ukraine ha baroh shi tlang.
La ong ba ka jingleit hap bad jingbthei u ‘namding ba la siat da ka Russia hapoh ka distrik Pavlograd ha katei ka sngi, ka la shim ia ka jingim jong 34 ngut ki paidbah nongshong shnong katei ka thaiñ kynthup lang ia ki khynnah rit kiba la ngat ha katei ka jingjia.
Napdeng jong kitei ki 34 ngut, 5 ngut ki dei ki khynnah, kynthup ia kawei ka khynnah kaba 8 snem ka rta bad kaba dang rit tam napdeng kitei ki khynnah ba khlad baroh.
Shuh shuh ka Ukraine ka la iathuh ba ka Russia ka la ther ia kitei ki ‘namding ha ka por kumba 2:30 jong ka kylla step Sngi Ba-ar, bad katei ka jingjia ka long ruh hadien ba watla ka Ukraine ka la ioh ban siat pynbthei ia 15 tylli napdeng ki 18 tylli ki ‘namding ba la siat da ka Russia sha Ukraine.
Kumjuh ruh na ka liang ka tnat iada jong ka Russia, ka la pyntip ba ka la ioh ban ther ‘namding sha ki thaiñ ba don ki jaka treikam jong ki shipai ka Ukraine ha katei ka step.
Ki bor pyniaid ka Ukraine ha ka Sngi Nyngkong ruh ki la pyntip ba ka Russia ka la ther ‘namding sha ki bynta jong ka Kherson, ha kaba 3 ngut ki la mynsaw bad iwei ba khlad hapoh jong ki 24 kynta ba la leit.
La ong ba ka jingiakhun hapdeng ka Russia bad Ukraine ka la poi sha ki bynta phang pdeng jong ka Donbas bad ka jingiakhun ka jur ruh khamtam hapoh ka nongbah Bakhmut.
