Shillong, Jymmang 02:
Saw ngut ki rangïalehkai hapoh ka lama jong ka Muay Thai Association of Meghalaya kin mih na ka nongbah ban leit mihkhmat ïa ka ri India sha ka “Seniors Men & Women IFMA WORLD Championship Muaythai” ka ban long ha Bangkok, Thailand.
Kane ka la wan hadien ba kane ka kynhun ka la ïoh jingïarap na ka Sorkar Jylla na ka bynta katei ka lympung ka ban sdang naduh 4 haduh 13 tarik mynta u bnai.
Kine saw ngut ki kynthup ïa u Lapynshai Syiemlieh (Under-23) u ban shim bynta ha ka 48 kilo, katba ha ka Elite ki long u Pynnehbor Mylliemngap u ban shim bynta ha ka 48 kilo, Edilbert Ryngdongsngi u ban shim bynta ha ka 85 kilo bad u Skhemborlang Marweiñ u ban shim bynta ha ka 51 kilo.
U President jong kane ka synjuk, u Bah Anjelus Sun, haba ïakren bad ki nongthoh khubor u la pynpaw ïa ka jingkmen halor ka jubab kaba la ïoh da ka tnat ïalehkai jong ka Sorkar Jyla. “Ngi sngewkmen ba ngi la ïoh ka jubab na ka Sorkar na ka bynta kane ka jingleit ïashim bynta. Ha ka jingshisha ka jinglut na ka bynta kane ka jingleit ïashim bynta ka long T. 8.42 lak, hynrei ngi la ïoh na ka tnat ïalehkai T. 5 lak.”
“Ngi khmih lynti ba ngin ïalehkai bha ha katei ka lympung namar kine ki rangïalehkai ki dei kiba la khur jingjop ha ka National Mauythai Championship kaba la long ha Madhya Pradesh myn ha u snem ba la lah bad dei na kane ka daw ba ki la shah jied ban mihkhmat ïa ka ri India sha katei ka lympung,” u la bynrap.
Ïa kane ka kynhun yn ïalam da u President ka synjuk u Bah Anjelus Sun bad u Bah Pynsuklang Sumer ki ban long kum ki Referee bad Judges ha katei ka lympung.
