Mumbai, Jymmang:
Katkum ka khubor ba lah pynmih da ka Board of Control for Cricket in India (BCCI) ka iathuh ba ka lah dain kuna ia arngut ki rangialehkai kita u Virat Kohli na ka Royal Challengers Bangalore bad u nongpyniaid jong ka kynhun Lucknow Super Giant u Gautam Gambhir. Kane ka jingpynshitom ka dei halor ka jingiakajia bad iakynad ka jong ki ha ka lympung ialehkai Indian Premier League (IPL) 2023 halor ka jingpynkhein ia ka Code of Conduct ha ka por ba kitei ki ar kynhun ialehkai ki dang don hapdeng ka jingia aireng.
Shuh shuh ruh ka khubor ka iathuh ba hadien ba ka RCB ka lah rah kum ka kynhun jingjop ha ki khyndiat ron ba katei ka kynhun ka la lah ban kamai ha ka tei ka jingiakhun pyrshah, ka lah mih ka jingiakynad hapdeng u Kohli & Gambhir kaba lah wanrah sha ka jingjia kaba heh ha kaba lah sakhi ia ka jingiadonlang jong kiba bun ki nongialehkai bad ki nongpyniaid jong ki tei ki ar kynhun ialehkai.
Hadien ba lah kut ka jingialehkai, u Kohli & Gambhir ki lah ia khublei kti mar kylliang bad ba kiei kiei baroh ki lah long jai-jai hynrei kata ka jingjai-jai ka long tang shuwa ba kan mih ka jingiakynad hapdeng jong ki. Ha ka kaiphod khubor ba lah pynmih, na ka liang jong ki nongpyniaid ka IPL ki iathuh ba u nongpyniaid jong ka Lucknow Super Giants u Gautam Gambhir u lah shah dain kuna da 100 % na ka jingsiew kaba u lah khur na ka jingialehkai halor ka jingpynkhein ia ka Code of Conduct jong ka lympung ha ka por ba ka kynhun ka iakhun pyrshah bad ka Royal Challengers Bangalore ha katei ka lympung ialehkai ba mynta. Kumta na ka liang jong u Gambhir u lah pdiang ruh ia ka jingpynkhein ka jong u ia ka Level 2 kaba hap hapoh ka Article 2.21 jong ka IPL’s Code of Conduct.
Ym tang katta, wat u nongtied ba pawkhmat jong ka Royal Challengers Bangalore u Virat Kohli u lah shah dain da mar katjuh ka kuna halor ka jingpynkhein ia katei ka juh ka kyndon bad uba lah pdiang ruh ia ka rai jingpynrem ka jong u halor ka jingpynkhein ia ka Level 2 kaba hap hapoh ka Article 2.21 jong ka CoC katei ka lympung ialehkai. Shuh shuh ruh, u nongkawang bol ka Lucknow Super Giants u Naveen-ul-Haq u lah shah dain kuna da mar shiteng (50%) na ka jingsiew kaba u khur na ka jingialehkai halor ka jingpynkhein ia ka CoC jong ka lympung ha ka jngiakhun pyrshah bad ka Royal Challengers Bangalore bad uba lah pdiang ruh ia ka jingshah pynrem ka jong u halor ka jingpynkhein ia ka Level 1 kaba hap hapoh ka Article 2.21 jong ka IPL’s Code of Conduct.
