Jowai, Jymmang 02:
Ka Lion Sports Youth Affairs ka rung sha ka final jong ka lympung ïalehkai ba la tip kum ka “Open to All Cricket Tournament 2023” ba la pynïaid da ka West Jaiñtia Hills District Cricket Association Jowai.
Kane ka la wan hadien ba ka Lion Sports Youth Affairs ka la lah ban pynliem noh ïa ka Moodymmai Cricket Club da 27 run ha ka jingïakhun semi final kaba la long ha ka Sngi Ba-ar ha madan Khliehtyrshi Mini Stadium.
Ha shwa ban sdang ïa ka jingïakhun, ïa ka jingkynting pisa la jop da ka Moodymmai Cricket Club bad ka la jied ban kawang bol shwa nyngkong bad ka la pynhap 7 wiket na ka 35 over.
U Ribok Hynñiewta u la pynhap 3 wiket na ki 6 over bad u Heimonlang Lyngdoh u la pynhap 2 wiket na ki 7 over. Katba na ka liang ka Lion Sports Youth Affairs u Nik Dan u la kamai 109 run na ki 93 bol bad u Deibormi Rangad u la kamai 93 run na ki 74 bol.
Ha ka kylla miet ka Moodymmai Cricket Club haba wan beh ïa ka thong ba la buh da ka Lion Sports Youth ka la lah ban tied tang 249 run na ka 35 over bad hap 8 wiket.
U Daowan Passah u kamai 41 runs na ki 37 bol, u Ribok Hynñiewta 39 run na ki 28 bol bad u Heimonlang Lyngdoh 34 run 29 bol. Na ka liang ka Lion Sports Youth Affairs u Peterson Lamare ula pynhap 3 wiket 7 over bad u Firstbornson Dkhar 2 wiket 6 over.
Ïa ka nam ‘Man of the Match’ la ïoh da Nik Dan jong ka Lion Sports Youth Affairs.
Ka jingïakhun final kan long ha ka sngi Thohdieng (5 tarik) hapdeng ka Lion Sports Youth Affairs pyrshah ïa ka Efty United XI Mynso.
