Sdang ka District Level Under-12 Football Tournament ha ka nongbah

Shillong, Jymmang 02:

Ka lympung ïalehkai Chief Minister District Level Under-12 Football Tournament 2023 ba la pynïaid da ka shlem ai jinghikai u District Sports Officer ka la sdang ha ka Sngi Ba-ar ha madan Polo.

       Ha kane ka lympung ïalehkai kaba ar sngi la wan ïashim bynta da ki khatwei tylli ki block jong kane ka district kiba kynthup ïa ka Mawlai, Shella Bholaganj, Pynursla, Mawryngkneng, Mawkynrew, Mawpat, Khat-ar Shnong, Mawsynram, Mawphlang, Sohïong bad ka Mylliem Block.

       Ha ki jingïakhun jong ki shynrang ha kane ka lympung, ka Mawryngkneng ka la jop haduh 4-0 kol ïa ka Mawphlang Block, ka Young Age Football (Nongmynsong) ka la pynliem noh ïa ka Rangdajied United School (Mylliem) da 5-4 kol.    

       Ka Mawlai ka la pynliem noh ïa ka Mawkynrew lyngba ka shi kol ba la thep da u Brayden Nongbet ha ka minit kaba 9. Ka Sohïong ka la pynjem khnap ïa ka Pynursla haduh 10-0 kol. Ka Khatar Shnong Block ka la pynliem noh ïa ka Mawpat Block da 2-1 kol.

       Ka Mawsynram ka la shah rem da 4-0 kol ha ka Mawryngkneng bad ka Mawlai ka la pynliem biang sa ïa ka Shella da 2-0 kol.

       Haba phai sha ka jingïakhun jong ki kynthei, ka Mawryngkneng Block ka la pynliem noh ïa ka Pynursla Block da 3-2 kol, ka Mawkynrew Block ka la shah rem noh ha ka Khatar Shnong Block da 3-1 kol bad ka Pay For Right (Mylliem Block) ka la pynliem noh ïa ka Sohïong Block da 3-0 kol.

       Ïa kane ka lympung yn pynkut ha ka Sngi Balang da ka jingïadon lang u khlur ïalehkai phutbol ka Jylla u Redeem Tlang kum u kongsan.