New Delhi, Jymmang:
Katkum ka khubor na ka tnat iada jong ka Britain, la ong ba ki shipai jong ka Russia ki la shah pynshitom bad shah set ha ki jaka set byndi ba syrtok namar ka jingkyntait ban leit iakhun sha madan thma pyrshah ia ki shipai ka Ukraine.
Kumta la ong ba ia kito ki shipai ki bym treh ban leit iakhun sha madan thma, ki bor pyniaid ka Russia ki bret ia kitei ki shipai hapoh jong ki thliew ba la tih khnang ban set along ia kiba leh pyrshah ia ka aiñ bad ia kitei ki thliew byndi la khot ki ‘Zindans’.
Namarkata la ong ba ka tnat iada jong ka Britain ka la ioh jingtip ba ka Russia ka la pyndonkam ia kitei ki thliew ban set along ia ki shipai jongka hi, namar ka jingbym treh jongki ban leit iakhun thma sha Ukraine. Ia kitei ki thliew la ker sawdong pat da ki nar lane ki ‘Grille’.
Ha ki khyndiat bnai ba la leit, la ioh jingtip ba ki heh shipai ka Russia ki la sdang ban ai jingpynshitom pyrshah ia kitei ki shipai ki bym treh ban leit iakhun thma, da kaba set shuwa ia ki hapoh kitei ki thliew byndi ‘Zindans’.
Kumta la ong ba kane ka long kawei na ki jingleh beaiñ jong ka Russia wat ia la ki jong ki shipai, nalor jong ka jingleit hiar thma ba khlem sangeh jongka pyrshah ia ka Ukraine.
Ki ‘Zindans’ ki long ka rukom pynshitom bad rukom set along ba ju leh ha ki por hyndai. La bna ruh ba ia ki Zindans la ju pyntreikam ruh ha ki bynta jong ka phang pdeng ka dew bah Asia ha kitei ki 20 century ba la leit.
