Washington, Jymmang:
Ka White House jong ka United States, ha ka Sngi Nyngkong ka la pynbna ba naduh ka 11 tarik jong une u bnai Jymmang, yn pynkut noh ia ka jingdonkam ban phah ai tika ia ki nongleit nongwan sha United States bad kumjuh ruh ia ki nongtrei sorkar hapoh ka ri.
La ong ba da ki Million ngut ki paidbah nongshong shnong jong ka United States, ki la shu lut ei tang ha ka khlam Covid-19. Hynrei ka White House ha kane ka kynti ka la pyntip ba namar ka jinglong jingman jong ka khlam Covid-19 ka la biang mynta, kumta ruh ka US kan ym phah ai tika shuh ia kito kiba leit rung sha US hadien jong katei ka 11 tarik.
Ka White House ka la pyntip ruh ba katkum ka kaiphod ba la ioh na ka World Health Organization (WHO), ka jingdon kiba khlad na ka khlam Covid-19 ka la hiar haduh 95% bad kumjuh ruh ka jingthiah pang bad jingïoh kem pang ki briew ha kylleng ka pyrthei ka la hiar sha ka 91% naduh u snem ba la leit.
Shuh shuh ruh ka White House ka la ong ba ka jinglah jong ka sorkar bad ki bor pyniaid jong ki ri bapher ha kylleng ka pyrthei, ban ai tika ia ki paidbah nongshong shnong, ka la iarap shisha bad ka la pyllait im ruh ia ki million kiba bun ki mynsiem briew na ka khlam Covid.
