Paris, Jymmang:
Katkum ka tyllong khubor ba la ioh lum ka iathuh ba u khlur shutbol jong ka klob ialehkai phutbol na France ka Paris Saint-Germain, u Lionel Messi, u la ngat mynta ha ka jingshah sospon ialehkai ha katei ka klob jong ka lympung Ligue1, hadien ba ka la ioh jingtip ia ka jingleit jong u sha ka ri Saudi Arabia dang ha ki khyndiat sngi ba la dep khlem da ioh jingbit na ki bor pyniaid jong katei ka klob.
Nangta ka khubor ka iathuh ruh ba utei u rangialehkai ka Argentina kaba la rah ia ka nam lahduh na ka World-Cup 2022 ha Qatar un kut ka jngiateh kontrak bad katei ka klob haba kut ka aiom ialehkai kaba mynta. U la shah khang ialehkai na ka bynta ki katto katne sngi, hynrei ka tyllong khubor na France ka iathuh ba u Messi un ngat ha ka jingshah sospon ialehkai haduh artaïew kynthih. Kumta katba u dang don hapoh katei ka jingshah pynshitom, u Messi un ym lah ban kilan met bad ka kynhun baroh kawei, un ym lah ban ialehkai bad un ym shah siew katba ka kyndon ka dang iaid shakhmat pyrshah ia u. Utei u rangialehkai u ban sa kynjoh sha ka rta ba 36 snem ha u bnai ban wan, u la dep ban ialehkai na katei ka klob ha ka jingshah rem ka jong ka da 3- kol ha ka jingiakhun ha-iing pyrshah ia ka Lorient ha ka lympung ialehkai Ligue1. Kumta u lah leit sha ka ri Saudi Arabia na ka bynta ban pynpura ia ka jingthmu bad len-lade ka jong u kum shi bynta jong ka jingiateh kontrak bad ka shlem treikam jong ka kam jngohkai katei ka ri.
Ka khubor ka iathuh ruh ba ka PSG shen kan sa sdang biang ia ka jingiaid lynti ka jong ka ha ka lympung da ka jingleit ban iakhun pyrshah ia ka Troyes kaba long ka jingialehkai kaba u Messi un duh ban shimbynta ha ka jingiakhun. Lada u hap ban shong shuwa sharud na ka kynhun ialehkai ka jong u haduh ar taiew, kata u Messi un duh ruh ban iadonlang bad ka kynhun ha ka jingiakhun jong ka ha-iing pyrshah ia ka Ajaccio ha ka 13 tarik mynta u bnai. Kum ban shu pynkynmaw hangne ka long ba u Messi u lah leit ban pyniasoh bad katei ka klob ialehkai da kaba mihnoh na Barcelona ha u snem 2021, hynrei uba lah shem jingeh na ka bynta ban pynkhie-im biang ia ka rukom ialehkai ba tbit ka jong u ha Paris da kaba kamai 31 kol ha ki 71 sien ioh ialehkai ha baroh ki jingiakhun. Ha ka aiom ialehkai kaba mynta, u Messi u lah kamai 20 kol ha baroh ki jingiakhun bad u long uba hakhmat eh ha ka kam pynbuh-bol sha ki para ba ialehkailang ha ka kynhun ha ka lympung da 15 sien.
