Jowai, Jymmang 03:
Ban pynurlong ïa ka jingkular, u Symbud Myntri Rangbah ka Jylla, u Bah Sniawbhalang Dhar u la leit jurip ïa ka madan Kiang Nangbah Stadium khnang ban lah pynïoh ïa ka skhim kaba kyrpang na ka sorkar.
Ha kane ka sngi ïa u Bah Sniawbhalang la synran lang da u Commissioner and Secretary ka tnat ïalehkai u Dr D. Vijay Kumar ha ka jingdonlang u District Sports Officer (DSO) Bah Khroobok Passah, ki dkhot nongkitkam ka WJDSA ba kynthup ïa u Working President Bah EMH. Passah, u General Secretary Bah Lammat-O Laloo, u Vice President Bah Patrick Lamare bad kiwei kiwei.
Haba ïakren bad ki nongthoh khubor u Bah Sniawbhalang u la ong ba ka jingwan jurip ka long shi bynta ban peit ïa ka jinglong jingman ka madan shwa ban pynkhreh ïa ka Details Project Report (DPR).
Kum ban shu pynkynmaw, u Bah Sniawbhalang haba wan pynhap pyrda ïa ka jinglehkmen Jubilee ka WJDSA ha ka 23 tarik u Ïaïong, u la kular ban mang T.25 klur na bynta ban pynbit pynbiang ïa kane ka madan.
Hadien kane u Bah Dhar u la leit jurip ïa ka jingpyntrei ïa ka madan Wahïajer Multi Sports Complex.
