Ka jingmih khubor ba ka seng People’s Democratic Front (PDF) kan khylliap lama noh na bynta ban leit pynïasoh sha ka seng National People’s Party (NPP) ha ka 6 tarik Jymmang, 2023, ka long ka khubor kaba biang namar kam don jingmut ban shu bun sa tang ki seng saiñpyrthei khlem nongrim. Ka PDF ka la mih ha u snem 2017, katto katne bnai shwa ka ilekshon MLA 2018, hapoh ka jingïalam jong u Bah Pynshngaiñ N Syiem. Ha kato ka ilekshon, ka la jop saw ngut ki MLA bad u Bah Pynshngaiñ u la iehnoh syndon ïa kane seng kaba u la seng hi tang hadien katto katne por. Na kine ki saw ngut, ar ngut ki la ïoh ban long Myntri ha ka sorkar Meghalaya Democratic Alliance (MDA) 1.0 bad ki la neh haduh kaba kut jong ka san snem. Hynrei, hashwa jong ka ilekshon MLA 2023, ar ngut na ki saw ngut ki MLA ka PDF ki la iehnoh bad ki la leit pynïasoh sha ka NPP. Ha ka ilekshon MLA kaba dang shu dep shen, ka PDF ka la jop tang ar ngut ki MLA bad wat lada ki la leit ban ai jingkyrshan ïa ka sorkar Meghalaya Democratic Alliance (MDA) 2.0, hynrei ki khlem ïoh satia ïa ka shuki Myntri ym kumba long san snem mynshwa.
Ban pynïaid ïa kano-kano ka seng saiñpyrthei, kam long kaba suk. Ki nongïalam ki hap ban pynlut ïa la ka por, ka bor bad ka pisa ban pynkhlaiñ ïa ka seng. Hadien hynriew snem duna jong ka jingïaid lynti, ki nongïalam ka PDF imat ki la sngewthuh ba kam dei satia kaba suk ban ïa pynlut por na ka bynta ban pynkhlaiñ ïa ka seng. Ha ka jingshisha, kam don jingmyntoi ban buh ïa kita ki seng saiñpyrthei lada ym lah ban pynkhlaiñ ne ban ïoh jingjop ha ka ilekshon. Ban shu jop tang iwei ne ar ngut ha ka ilekshon, ka long kam kai. Lada donbok, la shu ïoh long Myntri ei kha-ma-kha, bad lada sniewbok, hap ban shu shong ïa kyrshan narud khlem da ïoh jingmyntoi eiei. Kane ka jia ïa ki MLA ka PDF. Ha u snem 2018, wat la ka la don tang saw ngut ki MLA, kiba ïoh long Myntri ki la don arngut namar ha kato ka por, ka NPP ka hap ban long kaba jynsur mynsiem khnang ban neh ka sorkar. San snem hadien, ka PDF ka la ïoh ar ngut ki MLA, hynrei ki khlem lah shuh ban long kum ka rong ser bad ki la hap ban shu hun ban shong khlem shuki Myntri. Ka NPP kam donkam satia ban ai shuki Myntri ïa kine namar tang ki 26 ngut ki MLA ka NPP bad 11 ngut ki MLA ka UDP ki la biang lypa ban pynskhem ïa ka sorkar.
Ha ka saiñpyrthei ka ju long ka rukom ba haba dang donkam, baroh-baroh ki ïa wan khroh bad ynda ym donkam shuh, baroh-baroh ki ïa phai da ka lyngkdong. Ngi sngewthuh ba ka NPP ka kwah ban ïoh palat 31 ngut ki MLA tang marwei na ka 26 ngut kaba ka don mynta. Lada wan rung ki ar ngut na ka PDF, ka jingbun paid ha ka NPP kan kiew sha ka 28 ngut bad lada ka seng ka jop ïa ka ilekshon ha Sohïong konstitwensi, ka jingdon ki MLA kan kiew sha ka 29 ngut. Lehse ka NPP ka dang pyrshang ban khroh sa ïa kiwei pat ki MLA kiba dei na kiwei ki seng saiñpyrthei ban wan pynïasoh beit noh bad ka seng. Ka saiñ hima sima ha Meghalaya ka dei kaba kylla tang hapoh shi khyllipmat, bad bunsien hi, ka jingkylla ka wan ha ka por bym poi pyrkhat mano-mano. Ngim dei ban ïa sngewphylla lada kin dang don shuh ki MLA ki ban leit pynïasoh sha ka NPP ha kine ki sngi ki ban wan.
Lada ka PDF ka duh ka dam, ki paidbah kin lait noh na kawei ka seng saiñpyrthei bad kan long kaba bha. Ka jingbun palat ki seng saiñpyrthei, ka shu pynkulmar jingmut bad pynbunkam kai ïa ki paidbah. Ka jylla ka barit hynrei la satah sa tang da ki seng saiñpyrthei kiba ym da ïapher than ha ka nongrim jong ki. Ka nongrim kaba dei kajuh lut jong baroh ki seng ka long kumno ban ïoh shong shuki ha Secretariat bad ban pynïaid ïa ka synshar ka khadar bad ym eh ban shakri ïa ki paidbah. Lada duna ki seng saiñpyrthei, ka wanrah ïa ka jingbha. Ka long kum ka jingkyrkhu lada ki nongïalam ki sngewthuh ïa la ka jong ka bor bad kin ïa wan rung noh sha ki sem kiba kham heh bad ban ïatylli. Ngi donkam ïa ki seng saiñpyrthei tangba ym dei haduh ban da I kulmar sa ban peit bad ban sngap. Ka jingleh jong ki nongïalam ka PDF ka dei ban long ka nuksa ïa kiwei pat ba kim dei ban shu pynbunkam kai ïa ki paidbah bad ban sngewthuh ïa la ka jong ka bor.
Hynrei ngi kwah ban pynsngew ba ka long kaba donkam ïa ki seng riewlum ba kin ïatylli lang noh kawei namar kane ka jingïasaphret kam wanrah jingmyntoi eiei. Ngi la ïohi na kaei kaba la jia ha ka ilekshon kaba la dep ha kaba ka jingbun ki seng riewlum ka la shu pynpait kai ïa ka ‘vote’ bad ha kaba kut, la shu jop ei da mano-mano. Ki nongïalam ki seng riewlum ki dei ban ïa klet noh ïa ka jingsngew long heh bad ka jingsarong, bad ban ïashong lang ha kawei ka sem ban ïakren sani halor ka jingdonkam ban pynïatylli ïa baroh ki seng riewlum khnang ba ki paidbah kin lait na ka jingkulmar bad kan pynduna ïa ka jingsatah jong ki seng.
