Shillong, Jymmang 03:
Ka Power Grid bad ka SP Office ki la khur ïa ka jingjop ha ka lympung ïalehkai SCA Inter Office T20 Cricket League ha ka Sngi Balang ha madan Polo.
Ka Power Grid ha ka jingïalehkai pyrshah ïa ka Secretariat, ka la jop da 8 wiket. Ha shwa ban sdang ïa ka jingïalehkai, ka Power Grid ka la jop ïa kynting pisa bad ailad shwa ïa ka Secretariat ban tied nyngkong. Haba wan ban tied ka Secretariat ka la kamai 156 run bad shah pynkhyllem 6 wiket ha ki 20 over. U Mark A. Laloo u la tied 40 run na ki 22 bol bad u Sunny Marak u la ïoh 24 run na ki 26 bol. Katba u Babul Doley u la khur 2 wiket bad 1 wiket da u Tanay na ka bynta ka Power Grid.
Haba wan shimti ïa ka pali ba ar, ka Power Grid ka la kamai 159 run bad shah pynkhyllem 2 wiket ha ki 15.1 over. Kane ka la wan urlong lyngba ka jingïalehkai bha u Utpal Das uba la ïoh ban khyrwit ïa ka shiteng spah da kaba ïoh 77 run na ki 41 bol bad u Kuwar Dhrub uba la ïoh 65 run na ki 42 bol. Katba u Heipormi Lyngdoh u la khur 2 wiket na ka bynta ka Secretariat. Ïa ka nam ‘Player of the Match’ la khur da u Kuwar Dhrub.
Haba phai pat sha jingïakhun ba ar, ka SP Office ka la jop da 25 run ïa ka MeECL. Ka SP Office kaba la kam trai ban tied nyngkong ka la kamai 128 run bad shah pynkhyllem 8 wiket ha ki 20 over. U Morningstar Khongwir u la ïoh ban tied 46 run na ki 39 bol bad u Steve Syiemlieh u la ïoh 29 run na ki 34 bol. Katba u Arbinus Syiemïong u la khur 3 wiket bad 2 wiket da u Mebanpynshai na ka bynta ka MeECL.
Haba wan beh ïa ka thong, ka MeECL ka la kynjoh sha ka thong da kaba ïoh 103 run bad shah pynkhyllem 7 wiket ha ki 20 over. U Kyrshanbor u la tied 33 run na ki 41 bol bad u Arbinus Syiemïong u la ïoh 19 run na ki 24 bol. Katba u Jetu Daimary u la khur 3 wiket na ka bynta ka S.P Office. Ïa ka nam ‘Player of the Match’ la khur da u Morningstar Khongwir.
