Islamabad, Jymmang:
Katkum ki khubor la ong ba ka sorkar Pakistan bad ka seng jong u Myntri Rangbahduh barim jong ka Pakistan, ki la ia mynjur ban pynlong ia ka ilekshon paidbah ha kylleng jong katei ka ri ha kine ki khyndiat por ban wan. Kumta ruh la ong ba baroh arliang ki la ia iaid shakhmat bad ki la ia pynkhreh ban ia- aireng ha katei ka ilekshon ban wan.
Kane ka khubor ka long ruh hadien ba la iohi ba ka seng Pakistan Tehreek-e-Insaf jong u Imran Khan, ka la khmih lynti ban ioh noh ia ka ilekshon kaba kham kloi khamtam ha ki thaiñ jong ka Punjab bad Khyber Pakhtunkhwa ha kaba ki iing dorbar thaw aiñ jong kitei ki thaiñ ki la khyllem bad pulom noh ha u Kyllalyngkot, ha kaba ka sorkar Pakistan pat ka kwah ban pynlong beit ia katei ka ilekshon ha kajuh ka sngi ha kylleng jong ka ri Pakistan baroh kawei bad ia katei ka ilekshon la khmih lynti ba yn ioh ban pynlong ha u Risaw jong une u snem.
Kumta, ka sorkar bad ka seng PTI ha ka Sngi Ba-ar ki la iashong pyrkhat kam shimiet- shimiet ban ia pyrkhat bad mynjur lang halor ka jingpynlong ia katei ka ilekshon ka ban wan.
Kumta la ong ba ha kane ka por, kam don shuh kano kano ruh ka jing artatien ne ka jingkulmar jingmut halor ka jingpynlong ia katei ka ilekshon, namar baroh arliang ki la iabeit bad mynjur ba yn pynlong beit ia katei ka ilekshon ha kajuh ka sngi ha kylleng ka ri baroh kawei.
Nalor kata, la ong ba ia katei ka ilekshon yn pynlong ha ka rukom kaba kyrpang bha bad ba yn buh ia ki nong-ap bad ki bor pahara ha baroh ki jaka thep vote bad ha kylleng ki bynta bad ki dong ki kyntoit jong ka ri khnang ba kan ym don kano- kano ruh ka jingjia ba sngewsih ha katei ka sngi.
Hynrei dei sa tang ia ka tarik ba yn pynlong ia katei ka ilekshon, ba kin dang hap ban iapynbeit bad ban ap ruh ia ka rai na ki bor ba dei khmih.
Katei ka liang jong ka sorkar ka kynthup ia u Ishaq Dar, Khawaja Saad Rafique, Azam Nazeer Tarar bad u Sardar Ayaz Sadiq jong ka seng Muslim League-Nawaz (PML-N) bad la pyniasoh pat da ki nongialam ka seng Pakistan People Party kiba kynthup ia u Yusuf Raza Gilani bad u Syed Naveed Qamar bad kumjuh ruh da kiwei de ki seng kiba la iasnoh kti lang ha ka jingthaw ia kane ka sorkar ba mynta.
La ong ba ia katei ka jingialang ha ka Sngi Ba-ar, la pynlong hapoh ka iing dorbar thaw aiñ bad la pynbeit ban sdang naduh ka por 11 baje mynste, hynrei ka la poi shaduh ka 9 baje mymiet. Ia katei ka jingialang la wanrah hi da kitei ki arliang naka bynta ban weng noh ia ki jyrwit- jyrwat kiba pynwit bad pynthud haba iadei bad ka ilekshon ka ban wan, khnang ban wanrah ruh ia ka jingiabeit na baroh arliang bad ba ki kam ki jam kin iaid beit- iaid ryntih.
