Tashkent, Jymmang:
Uwei na ki nongiakura ba la pawbha ha ka lympung ialehkai Olympic ha Tokyo u Ashish Chaudhary u lah jam mynta sha ka rynsan iakhun pre-quarterfinal na ka kyrdan iakura ha ka jingkhia kaba 80kg, hadien ba u lah ioh ia ka rai na ki nongbishar lyngba ka Split Decision kum u nongjop ia u nongiakura pyrshah na Iran u Meysam Gheshlaghi ha ka lympung iakura kaba dang long mynta ha Tashkent ka Men’s World Boxing Championships.
Kumta ha katei ka jingiakhun, u Ashish da ka jngiakhun ba tyngeh ka jong u, u la lah ban khur shalade ia ki 4-1 jingjop pyrshah ia utei u nongialehkai, hadien ba u Ashish u lah sei ai ka sap ialehkai ba tbit ka jong u da ki katto katne ki jingkura kiba u lah pynmih da ka bor na ka bynta ban pynshaiong ia utei u nongiakhun pyrshah ha ka kylla iakhun kaba nyngkong bad uba lah pyndonkam ruh da ka rukom kura kaba kham kyrpang bad ka jingpynkhlain ia ka rukom ialehkai ka jong u na ka bynta ban jop pyrshah ia utei u nongialehkai.
Hadien katei ka jingjop, u Ashish un hap ban mad ruh sa kawei pat ka jingiakhun kaba kham eh na u lahduh Olympic haduh arsien uba na ka ri Cuba u Arlen Lopez ha katei ka rynsan iakhun kaba u lah ioh ban rung. Kumjuh ruh u Harsh Choudhary u lah shah pynwai noh ka jingiaid lynti ha ka lympung hadien ka jingshah pynliem noh da 0-5 lyngba ka jingiarailang da ki nongbishar ha ka jingshah pynrem ka jong u ha u nongiakura na Australia u Billy McAllister ha ka 86kg.
