Kenya, Jymmang:
Katkum ki khubor la ong ba ha ka jingiakhih ba la pynlong da ka liang pyrshah ha Kenya, kawei ka bos bad kawei ka kali ki la shah wiang ding hapoh ka thaiñ Nairobi jong katei ka nongbah Kenya.
Kumta, ka la mih ruh ka jingïakynad hapdeng ki paidbah nongïakhih bad ki pulit kiba ap para ha ki katto katne ki bynta jong katei ka nongbah. Katba kiba bun pat ki jaka kim shym la don jingkulmar eiei.
La ong ba ki don katto katne ki nongialam kiba la thmu ban wiang ding ia ki ophis treikam jong u President ha ka phang pdeng jong ka distrik, hynrei ki la shah bat noh ha ki pulit, ha kaba ki pulit ki la hap ban pyllait da ki tdem pynsat khmat khnang ban tehlakam ia ka jingïakynad ha katei ka por.
Kumta, ki bor pyniaid ka Kenya ki la phah da ki bor pahara ban leit tehlakam bad ban em ia ka jingïakynad ha katei ka nongbah.
Katba ha ki bynta West jong ka Kisumu bad Homa Bay, kitei ki nongïakhih ki la khang bad set kut ia ki surok bad ki lynti iaid baroh kylleng sawdong jong kitei ki thaiñ bad ki la thang ruh da ka ding kum ka dak ban pynpaw ia ka jingpyrshah jur.
Namarkata, la ong ba kiba bun ki dukan bad ki jaka treikam hapoh Kisumu ki la khang khyrdep noh namar ki jingkulmar bad ki kynrum kynram na katei ka jingiakhih ha katei ka nongbah.
