Ottawa, Jymmang:
Uwei na ki nongialehkai iakob mareh na ka ri Botswana u Nijel Amos mynta u lah shah khang ban shimbynta ha kino kino ki lympung ialehkai haduh lai snem kynthih hadien na utei u nongkhur takma Rupa na ka 2012 Olympic na ka jingiakob mareh 800m lyngba ka jing-leh ia ka jingpeitbniah la lap ba u lah pyndonkam ia u dawai GW1516 ia kaba lah khang pyrshah da ka WADA ha ka ban pyndonkam da ki nongialehkai.
Kumta na ka liang jong ka Athletics Integrity Unit (AIU) ka iathuh ba katei ka jingshah sospon ialehkai ka jong u ka lah treikam naduh ka 12 tarik u Naitung 2022 kaba long ka tarik jong ka jingshah sospon ba khlem buh por bad ka ban sa kut noh haduh ka 11 tarik u Naitung 2025. Shuh shuh ruh ki resol kiba utei u nongialehkai u lah khur haduh mynta bad naduh ka 4 tarik u Jylliew 2022 lah rai pynrem noh ia kita baroh. Ia u GW1516 ia kaba lah lap na ka met jong utei u rangialehkai, u long u dawai ha ka ban pynwandur bad thaw thymmai biang ia ka met u briew bad ka jingtreikam ruh ha ka ban pynduna ia ka khlein bad ka World Anti-Doping Agency ka lah iathuh ba katei ka jingleh da kaba pyndonkam ia utei u dawai ka wanrah ia ka jingma kaba khraw ha ka liang ka koit ka khiah jong ki nongialehkai.
Kum ban shu pynkynmaw biang hangne ka long ba u Amos uba lah khur ia ka takma Rupa na ka Olympic 2012 ha London u long uba nyngkongeh ha ka ban pynioh sha ka ri jong u ia katei ka takma na katei ka lympung ialehkai. Shuh shuh ruh ha ka Olympic 2021 ha Tokyo utei u nongialehkai u la lah ban khur ruh ia ka takma Rnong na ka jingiakob mareh Relay 4x400m.
