Shillong, Jymmang 04:
Ka SP Office ka la khur ïa ka jingjop ha ka lympung ïalehkai Inter-Office Cricket Tournament 2022-23, hadien ba ka la lah ban pynliem noh ïa ka AH & Veterinary da 7 wiket ha ka sngi Palei ha madan Polo.
Ha kane ka jingïakhun ka Veterinary kaba la kam trai ban tied nyngkong ka la shah pynkhyllem baroh ki nongtied ha ki 19 over bad kamai tang 99 run. Kane ka la wan lyngba ka jingïalehkai bha ki nongkawang bol ka SP Office, kita u Kamal Thapa uba la khur 4 wiket bad Morninstar uba la khur 3 wiket.
Katba ki nongtied ka Veterinary kiba la lah ban ïalehkai bha ki long u Deibormi Rangad uba la ïoh 39 run na ki 36 bol bad u Tammiki Tariang uba la ïoh 15 run na ki 18 bol.
Haba wan shimti ïa ka pali kaba ar, ka SP Office ka la kynjoh sha ka thong da kaba kamai 101 run bad shah pynkhyllem 3 wiket ha ki 12.5 over. U Deepak Thapa u long u nongtied uba la ïoh 30 run na ki 30 bol bad u Sauni Nongtdu u la ïoh 22 run na ki 21 bol. Katba ki nongkawang bol kiba ïalehkai bha ki long u Lewotki Pariat uba la khur 2 wiket bad 1 wiket la khur da u Deibormi Rangad. Ïa ka nam ‘Man of the Match’ la khur da u Kamal Thapa.
Haba phai sha kawei pat ka jingïakhun, ka AG Office ka la jop da ka ‘walkover’ hadien ba ka KV Happy Valley kam shym la wan mih madan.
