Spain, Jymmang:
Katkum ka khubor ba lah pyllait da ka klob ialehkai phutbol jong ka lympung Spanish La Liga ka Real Madrid, ka iathuh ba ka lah nangjan mynta ka lynti sha ka jing-iasoi kontrak ialehkai bad u rangialehkai shapdeng ka Borussia Dortmund u Jude Bellingham.
Kumta ha kaba iadei bad katei ka bynta, utei u rang-ialehkai bar-ri ka England uba dang ha ka rt aba 19 snem, u long uwei na ki nong-ialehkai ba paw-bha ha ka kam ialehkai phutbol ha ka pyrthei. Mynta u la shah kynshoit ban mih noh na katei ka klob ialehkai kaba u don mynta jong ka lympung Bundesliga ban leit pyniasoh bad kawei ka klob ba radbah ha Spain ha ka dor 100 million euros ($110 million).
Kum u rangialehkai jong katei ka klob, u Bellingham u lah seisoh bha ka kam ialehkai ka jong u ha ka lympung ialehkai World Cup 2022 na ka kynhun ialehkai ka jong u ka England bad uba lah shah phaikhmat mynta ruh sha kawei pat ka klob ialehkai na England ka Manchester City kaba lah pynpaw ia ka jingkwah jong ka ban soi ia u.
Kum ban shu pynpaw biang hangne ka long ba u tei u rangialehkai u lah iasoi bad katei ka klob ialehkai Bundesliga ha ka por ba u dang don ha ka rta ba 17 snem bad uba dang ialehkai ha ka lympung Championship na ka klob Birmingham City na ka bynta ka jingshah siew kaba haduh 29 million euros ($32 million) bad uba lah kylla long u nongialehkai ba hakhmat eh jong katei katei ka klob ialehkai kaba u dang ialehkai mynta.
Ki khubor ki iathuh ruh ba kano kano ka jingiateh hapdeng ka Madrid bad Dortmund yn ym pat pynbna paidbah tad haduh kaba kut jong ka aiom ialehkai ba mynta ka lympung Bundesliga.
Ka jingkwah jong ka Real Madrid ban iateh kontrak bad utei u rangialehkai ka long namar ba katei ka kynhun ka dang iai wad rangialehkai na ka bynta ka jingiateh kaba jlan bad kum u nongmih bujli ha ka jaka jong ki rangialehkai shapdeng ka kynhun kata u Luka Modric bad Toni Kroos.
Kumta katei ka klob ka lah dep ruh ban thied ia arngut ki rangialehkai ba dang kham khynnah na France; u Eduardo Camavinga bad Aurelien Tchouameni ha ki ar samoi ialehkai ba lah dep lyngba ka iew iadie-iathied bad kaba lah die noh ia u rangialehkai shapdeng kaba ka lah bat baroh shi katto u Casemiro sha ka klob ialehkai ba pawnam na London ka Manchester United.
Kum u rangialehkai ba pawkhmat ka Dortmund, u Bellingham u la lah ban kamai ia ki 21 kol ha ki 130 sien ioh ialehkai ki jong u ha baroh ki jingiakhun naduh ba u lah pyn-iasoh bad ka klob ha u 2020.
