Khliehriat, Jymmang 04:
Ka Seiñ Jait Tuber Higher Secondary School bad ka Cham-Cham Secondary School ki la rah ïa ka nam lahduh (Champion) ha ka lympung ïalehkai Chief Minister District Level Inter School Athletic Meet 2023 ba la pynïaid da ka shlem treikam ka District Sports Officer (DSO), East Jaiñtia Hills District ryngkat ka jingïatreilang ka East Jaiñtia District Sports Association (WJDSA) ha madan Teilang Dkhiah ha ka sngi Palei.
Ïa kane ka lympung ïalehkai kaba la neh lai sngi lynter, la pynhiar lama ïa ka da u Superintendent of Police, East Jaiñtia Hills District u Jagpal Singh Dhanoa (IPS) ha ka jingdonlang ka District Sports Officer ka Kong S.M Rapsang, Sports Officer ka tnat Sports and Youth Affairs ka Kong Darleen Khonglam, ka DSO jong ka West Khasi Hills ka Kong Balarina Syiem.
Ka Seiñ Jait Tuber Higher Secondary School ka la ïoh rah ïa ka nam lahduh hadien ba ka la khur 22 tylli ki takma, kynthup 10 tylli takma ksiar, 9 tylli ki takma rupa bad 3 tylli ki takma rnong.
Katba ka Cham-Cham Secondary School ka la ïoh khur 14 tylli ki takma, kynthup 5 tylli ki takma ksiar, 5 tylli ki takma rupa bad 4 tylli ki takma rnong.
Ïa ka nam Best Discipline School la ïoh rah da ka skul Sein Raij BR. U.P.S, Mukhaïalong.
Ki skul kiba la ïoh ïa ka nam Best Athletes ki long ka Seiñ Jait Tuber Higher Secondary School, ka Ïeng Swer Memorial Secondary School, Seiñraij BR. UPS Mukhaïalong, ka Good Shepherd Secondary School Ladrymbai bad San Shnong Secondary School Mukhaïalong.
Ka Seiñ Jait Tuber Higher Secondary School ka la ïoh khur artylli ki kyrdan ha ka nam Best Athlete kynthup ka Under-14 Boys ha ka jingïakop mareh kaba 60 meter ba la mihkhmat da u Mutskhem Sari bad ka Under-16 Boys ha ka jingïakop mareh kaba 2000 meter ba la mihkhmat da u Dathrangshwamiki Shylla.
Ka Ïeng Swer Memorial Secondary School ka la ïoh ha ka kyrdan Under-14 Girls ha ka jingïakop Long Jump ba la mihkhmat da ka Turoi Phawa.
Ka Seiñraij BR. UPS Mukhaïalong ka la ïoh ha ka kyrdan Under-16 Girls ha ka jingïakop mareh kaba 2000 meter ba la mihkhmat da ka Thaibiang Phawa.
Ka Good Shepherd Secondary School Ladrymbai ka ïoh ha ka kyrdan Under-18 Boys ha ka jingïakop Long Jump ba la mihkhmat da u Damehi Chyrmang.
Ka San Shnong Secondary School Mukhaïalong ka la ïoh ha ka kyrdan Under-18 Girls ha ka jingïakop mareh kaba 3000 meter ba la mihkhmat da ka Wansaki Phawa.
Nalor u kongsan, la donlang ruh ka District Child Protection Officer, Khliehriat ka Kong R.D Kynjing, u Working President ka EJDSA Bah James Sutnga, u General Secretary EJDSA u Bah Comingone Tlang, ki principal bad ki nonghikai na ki skul bapher bapher ka District.
Na ka liang katei ka shem treikam ka la jied ia ki nongialehkai kiba kynsai ki ban mihkhmat ia ka District sha ka State Level ka ban sa long shen ha ka nongbah Shillong.
