Madrid, Jymmang:
U khlur ialehkai Tennis ka ri Spain uba dang iai bat kum u lahduh u Carlos Alcaraz, u lah jam mynta sha ka rynsan iakhun semifinal ha ka lympung ialehkai ba mynta ka Madrid Open, hadien ba utei u rangialehkai u la lah ban khur jingjop ha baroh shi lynter ki set iakhun pyrshah ia u Karen Khachanov bad ka ka Iga Swiatek ruh kumjuh ruh ka lah jam sha katei kajuh ka rynsan.
Kumta u Carlos uba long u lahduh US Open u la lah ban ialehkai bha haduh ba un da lah ban khur noh shalade ia ki 4-1 bad 5-2 jingpyniapher dor-thong ki jong u ha ka set iakhun kaba ar na ka bynta ban pynliem noh ia u Khachanov da 6-4, 7-5. Hadien katei ka jingjop ha ka jingiakhun kaba lah neh shi kynta 52min ialehkai, u Carlos un hap ban pynkhreh bha ialade sa na ka bynta ka jingiakhun pat bad u nongialehkai na Croatia u Borna Coric; uba lah pynliem noh ia u nongialehkai na Germany u Daniel Altmaier da 6-3, 6-3.
Ka khubor ka iathuh ruh ba lada u Alcaraz u rah ia ka trophy jingjop na katei ka lympung ialehkai kaba la long mynta ha nongbah jong ka ri Spain, un sa pynliem noh ruh ia u khlur ialehkai na Serbia u Novak Djokovic na ka kyrdan ba nyngkong ha ka pyrthei ha ka thup kyrdan da kaba ialehkai ia ki jingialehkai ha ka Italian Open ka ban sa long ha nongbah Rome ha ka taiew ban wan.
Haba phai sha ka jingiakhun paramarwei ki kynthei, ka Iga Swiatek kaba bat ia ka kyrdan ba nyngkong ha ka pyrthei ka lah jam sha katei kajuh rynsan iakhun hadien ba ka lah khur noh shalade ia ki 6-0, 6-3 jingjop pyrshah ia ka Petra Martic na Croatia.
Ka long ruh ka sien kaba ar ha kaba ka Iga ka lah shimbynta ha ka lympung bad kaba mynta kan pynkhreh sa na bynta ka jingiakhun bad ka nongialehkai na Russia ka Veronika Kudermetova ha ka jingiaknieh jaka jong ki sha ka phainal. Shuh shuh ruh ka Kudermetova ka lah pynliem noh ia ka Jessica Pegula da 6-4, 0-6, 6-4.
