Shillong, Jymmang 04:
U Erling Haaland u la lah ban thaw ïa ka rekod kaba heh duh ha ka Premier League hadien ba u ïoh thep kol biang na ka bynta ka Manchester City ban pynliem ïa ka West Ham United da 3-0 kol ha ka sngi Palei ha Etihad.
Une u rangïalehkai shakhmat na Norway u la ïoh ban thep kol ha ka minit kaba 70 na ka bynta ban khur haduh 51 kol na ka bynta ka Man City mynta ka aïom.
“Ka long kaba eh ban ngeit namar u dang don ha ka karta kaba 22 snem, hynrei u la lah ban leh ïa kaba phylla. Mynta ngi dangsah sa san sien ïakhun,” la pynpaw u manager ka Man City u Pep Guardiola hadien ba la kut ka jingïalehkai.
“Ngi khmih lynti ba un lah ban thep kol biang. Kan long kaba kham kyrpang eh lada u lah ban pynpra ïa ka rekod jong u Cole bad u Shearer.”
Wat la ka Arsenal ka la wanphai biang sha ka kyrdan ba hakhlieh ha ka sngi Balang hadien ba jop ïa ka Chelsea da 3-1 kol, hynrei lyngba ka jingjop ha kane ka sngi ka la pynlong biang ïa ka Man City ban lamkhmat biang ha kane ka lympung da kaba tam 1 dor-thong (point) ïa ka kynhun jong u Mikel Arteta. Ka West Ham lyngba kane ka jingshah rem mynta ka la don ha tmier jong ka jingma ban shah pynhiar kyrdan.
Haduh kaba kut jong ka kylla step kitei ki kynhun kim shym ka lah ban thep kol, hynrei dei hadien saw minit ba u Nathan Ake u la ïoh ban pynkhih jar lyngba ka ‘free kick’.
Hadien katto katne por u Haaland u la ïoh ban pynbud ïa ka kol ba ar hadien ka jingïarap pynbuh bol da u Jack Grealish ha ka minit kaba 70. U rangïalehkai shongben u Phil Foden u la ïoh ban thep ïa ka kol kaba khatduh eh ha ka minit kaba 85 na ka bynta ban pynlong ïa ka Man City ban khur ïa ka jingjop.
Lyngba kane ka jingjop, ka Man City kaba la khur ïa ka nam jop haduh hynriew aïom hapoh ka jingïalam u Pep Guardiola, ka la kamai 79 dor-thong (point) na ki 33 sien ïakhun, katba ka Arsenal ka dangsah 78 point.
Ka Man City ka lah ban ïai bteng ban bat ïa katei ka kyrdan ba hakhlieh lada ka lah ban pynliem sa ïa ka Leeds United ha ka jingïalehkai ha ïing ha ka sngi Saitjaiñ.
Nalor ka jinglah ban ïalehkai bha ha ka Premier League, ka Man City kan pynkhreh ruh ïa ka jingïakhun semi-final ha ka Champions League bad ka final ha ka FA Cup.
