Mumbai:
Katkum ka khubor ba la ioh na Bollywood la iathuh ba ka Deepika Padukone bad ka Katrina Kaif kin sa iakynduh lang ha kawei ka phlim jong ka Yash Raj ha kaba kane kan long ruh ka phlim ban lam khmat da ka kynthei. Hadien ka jingpynbna ia ka kyrteng jong kitei ki puron, ki paidbah ki la ai jingmut ruh ia u direktor kane ka phlim ban pyn-iashim bynta ia u Ranbir kum u riewsniew.
Ka Deepika bad Katrina kiba la long lypa ki puron ba kynsai ka Bollywood lehse kin sa khring ia kiba bun ban kwah peitkai ia kane ka phlim ba kin shim bynta lang bad kane kan dei ruh ka phlim banyngkong na ka bynta jong ki ba kin ak.
Hadien ka Pathaan, ka YRF ka la shim ia ka rai ban pyniakynduh lang ia ka Deepika bad Katrina ha kawei ka phlim syntiat ha kaba kane ka lah ruh ban long kawei na ki phlim ba itynnad bha jong u snem ban wan.
Ym pat ju don kano kano ka phlim Bollywood ka ban ak da ki puron ka ban dei halor ki ‘syntiat bad lehse kane kan dei ruh kaba nyngkong.
Ka Deepika bad Katrina ki la mynjur ban ak ha kane ka phlim bad baroh arngut kim don jingsngew satia ban ak phlim ryngkat hadien ba ki la pynkut noh ia ka jingkynad jong ki.
Ha ki snem ba la leit ka daw kaba la mih halor ka jingkynad jong kine arngut ka dei tang namar u Ranbir uba la thok bad shukor ia ka Deepika da kaba don jing-iadei bad ka Katrina bad ha kajuh ka por u la thok ia ka Katrina da kaba iaiaid buhrieh bad ka Alia kaba dei ruh ka paralok ba iajan bha bad ka Kat.
Ki nongbud bad nong kyrshan ka Deepika bad Katrina ki sngew ruh ba u Ranbir u biang bha ban ak kum u riewsniew ha kane ka phlim namar ba une u tyngshop u la pynisih bad pyniashun bha ia ka Katrina bad Deepika ha ki por ba la leit.
Lehse kane ka jingai jingmut jong kiba bun ban pynak ia u Ranbir kum u riewsniew ka dei kaba biang bha.
