Shillong, Jymmang 05:
Ka kynhun ïalehkai U-21 jong ka Shillong Lajong ka la ïoh ban mih noh na Imphal hadien ba ka la mih ka jingïakynad kaba jur ha ka jylla Manipur.
Kane ka kynhun ïalehkai na nongbah ka la ïashim bynta ha ka lympung ïalehkai (national group stage) ba la pynlong da ka Reliance Foundation Development League.
Hadien katei ka jingjia, na ka liang ka Sorkar Jylla ka la pynkhreh ïa ka liengsuiñ kaba kyrpang na ka bynta ban kit ïa ki briew na Manipur hadien ba ka la mih ka jingïakhih kaba jur ha kine ki khyndiat sngi ba la dep.
Ka Shillong Lajong ka la bat ïa ka kyrdan ba hakhlieh ha ka Meghalaya-Assam preliminary stage bad ka la ïoh rung sha ka national group stage, ha kaba ka hap ban leit ïakhun sha Imphal. Kumta kane ka kynhun ka la shah kynthup lang bad ka North East United, ATK Mohun Bagan, Classic Football Academy bad ka Sports Authority of India-RC.
