U Nongsaiñ Hima 1969
Ka Hima Khadsaw phra (lane Hima Nongkhlaw) ka dei ka Hima Khasi kaba ar ban iateh kular bad ban rung hapoh ka jingiada jong ka British East India Company, kaba nyngkong ka dei ka Hima Sutnga (lane Hima Jaintiapur). Ha ka por ba ia teh kular, u Syiem Sutnga u shong ha Jaintiapur, ka jaka kaba don ha Jaintia Pargana ha Rithor Sylhet bad ia u Syiem la khot u Syiem Jaintiapur. Ki Syiem Khadsawphra bad ki Syiem Sutnga ki ia dei shikur. Ka jingiateh kular hapdeng ka Hima Jaintiapur bad ka British East India Company ka la jia ha ka snem 1824 ha ka por ba long Syiem u Ram Singh. U Ram Singh u dei u khun ka Rata bad u long Syiem naduh ka snem 1789 haduh ka snem 1932.
Hadien u Ram Singh, la long Syiem u pyrsa jong u, uba kyrteng u Rajendra Singh. U Rajendra Singh u dei u khun jong ka Lakhi. Ka Lakhi ka dei ka hynmen jong u Ram Singh. Kumba don ki Khasi mynta kiba ia kyrteng phareng ia la ki khun (lehse na ka jingtrei jong ka niam Khristan) kumjuh ruh don ki Khasi mynshuwa kiba kyrteng dkhar ia la ki khun (lehse na ka jingtrei jong ka niam Hindu). Katkum ka jingthoh jong u Dr.R. M. Lahiri ha ka kot “Annexation of Assam, u Rajendra um dei u pyrsa hynrei u dei u pyrsa ksiew jong u Ram Singh, kata ka mut ba ka Lakhi ka dei ka pyrsa jong u Ram Singh. La ong ba u Rajendra Singh um nang ban kren Sutnga bad um don ruh ka jingiadei jingmut bad ki khun ki hajar kiba don ha elaka rilum. Ha ka snem 1835 ha ka por ba long Syiem u Rajendra Singh, ka British East India Company ka la shimti noh ha lade ia ka jingsynshar ia ka Hima Jaintiapur baroh kawei. Ia ka bynta jong ka Hima Jaintiapur baroh kawei. Ia ka bynta jong ka Hima Jaintiapur (Gobha) kaba don ha rithor Nowgong la pyniasoh bad ka Nowgong District bad ia ka bynta jong ka Hima Jaintiapur (Jaintia Pargana) kaba don ha rithor Sylhet la pyniasoh bad ka District Sylhet. Ia ka elaka rilum jong ka Hima Jaintiapur la khot Jaintia Hills. Ia u Rajendra, ka British East India Company ka la shu ai noh da ka pension ha ka dor 500 tyngka shibnai (ka hynmen jong u Rajendra Singh ka don ar ngut ki khun shynrang, u Mahu Singh bad i Chitra Nap). Ka British East India Company ka la tyrwa ia u Rajendra Singh ban bat ia ka jinglong syiem tang ha ka elaka rilum jong ka Hima Jaintiapur hynrei um treh. Don bun ki daw balei ba u Rajendra Singh um treh. Don bun ki daw balei ba u Rajendra Singh um treh ban long syiem tang ha ki elaka rilum jong ka Hima Jaintia, bad la ong ba kawei na kid aw ka long ba um lah ban lum khajna na la ki khun ki hajar kiba don ha ki elaka rilum kumba u lum khajan na ki raiot kiba don ha rithor. Lada u Rajendra Singh u la pdiang ia ka jingtyrwa jong ka British East India Company, ka FEDERATION OF KHASI STATES ia kaba la seng ha ka snem 1946(hapoh ka jinglong President jong u Olim Singh Syiem Khyrim) kan jian da la long ka Federation kaba kham heh kaba yn kynthyp 26 tylli ki Hima Khasi bad ba ha ka Lama jong ka yn jin da la don 26 tylli ki KHLUR.
Kumba la ong, ka Hima Khasi kaba ar kaba la IATEH KULAR bad ka British East India Company ka dei ka Hima Khadsawphra (lane Hima Nongkhlaw) ka jing-iateh kular ka la jia ha ka snem 1926 ha ka por ba long syiem u Tirot Singh.
Ha ka snem 18229 la khie ka thma hapdeng ka Hima Nongkhlaw bad ka British East India Company. Bun ki Syiem Khasi, kum ki jong u Bormanik (u Syiem ka Hima Shillong) ki la ia synrop lang bad u Tirot Singh ha kaba ialeh pyrshah ia ka British East India Company. Ola ong ba 6tylli ki Hima Khasi (Jaintiapur, Khyrim, Sohra, Langrin, Nongspung bad Nongstoin. Kim shym la ia synrop lang bad u Tirot Sing ha kaba ialeh pyrshah ia ka British East India Company.
Hapdeng ka snem 1929 bad 1833, ka British East India Company kala ioh kem ia u Bormanik. Hadien ba la shah kem, da ka jingbym banse u Bormanik u la iateh kular bad ka British East India Company.
Hynrei u Borminik um sngewhun satia ban sah kum u Syiem hapoh ka jingiada jong ka British East India Company. Kumta ryngkat bad katto katne ki nongbud jong u, u la mih na la ka Hima bad la ong ba u la poi sha Tibet. Katkum ba ka paw na katei ka jingiateh kular imat ka British East India Company kam shym ithuh shuh ia u Bormanik kum u Syiem ka Hima Shillong, hynrei tang kum u Syiem jong ka Hima Mylliem.
Katkum ka jingiathuhkhana pateng la ong ba dei hadien u Bormanik ba ia ka Hima Shillong la phiah ha ki ar Hima (Hima Mylliem bad Hima Khyrim) bad ba u Syiem uba nyngkong jong ka Hima Khyrim u dei u Sing Manik.
Mynta yn ia phai biang sha ka jingialeh hapdeng ki Hima Khasi bad ka British Eat India Company. Hadien ka jingialeh kaba la neh kumba saw snem ei – ei, u Tirot Singh u la pyndem wait pyndem stieh ha ka 13 tarik January 1833. Hynrei wat ha-dien ka jingpyndem wait pyndem stieh jong u Tirot Singh ruh, dang don ki Hima Khasi kiba ka British East India Company kam pat lah ban pyndem, bad kawei na kita ki Hima ka dei ka Hima Maharam hapoh ka jingialam jong u Sngap Singh, u Syiem jong ka Hima Maharam ha kata ka por.
La ong ba ka jingialeh kaba jur eh ka dei ha ki thaiñ Nongnah ha kaba ia ki kut ba skhem jong ka Hima Maharam la tei ha Nongkdait, Mawtajem bad Tynrong Bamon. Ka jingialeh hapoh ka jingialam ba radbah jong u Sngap Singh ka la neh bun snem bad dei ha ka snem 1939 ba u Sngap Singh u la pyndem wait pyndem stieh bad da ka jingbymbanse u la iateh kular bad ka British East India Company.
Lait noh ia ka Hima Jaintiapur, ka British East India Company kam shym shimti lut ha lade ia ka jingsynshar ia kiwei pat ki Hima Khasi. U Syiem Nongkhlaw uba kyrteng u Rajon Singh, uba long syuiem hadien u Tirot Singh u la iateh kular bad ka British East India Company ha ka 29 tarik March 1834.
Ha ka snem 1857 la khie ka thma. Ia kaba ha ki por synshar Phareng la ju tip kum ka Thma Haramnimok (Sepoy Mutiny). Hadien ka thma, ka Sorkar Bilat ka la shimti noh halade ia ka jingpyniaid na ka kti jong ka British East India Company. Kumta ka jingiadei jong ka Hima Khasi bad ka Sorkar Bilat ka la long lyngba u Vice – Roy.
Ha ka snem 1863 ha ka por ba u Mile Singh u long u Syiem jong ka Hima Mylliem, ka Sorkar Bilat ka la kwah ban ioh ka jaka katto katne ha Shillong bad lehse da ka jingbym banse u Mile Singh u la ai bad ia soi ia ka Agreement.
U Dr. Hamlet Bareh ha ka kot jong u, “The History And Culture Of The Khasi People” u ong, “In 1863 Mile delivered large plots of lands in Shillong Town for the establishment of military cantonment and sanitorium to the Government. He renounced his sovereignty and personal rights therein.
Na kawei ka por sha kawei ka por, ki Hima Khasi ki la ia tyngkhuh kam bad ka Sorkar Bilat lyngba u Vice Roy bad lyngba u Governor kum u Agent. Ka jingiateh kular jong ka Hima Khasi bad ka Sorkar Bilat ka la kut ha ka 15tarik August 1947 katkum ka section 7 jong ka INDIAN INDEPENDENCE ACT, 1947. Ki Hima Khasi ki la long ka bynta jong ka India da kaba soi ia ka Instrument of Accession ha ka snem 1948.
