Washington, Jymmang:
Ka White House ha ka Sngi Balang ka la kyntait halor ka jingpharep jong ka Russia ba ka United States ka iadon kti lang na lyndet haba iadei bad ka jingthmu thombor ia u Putin hapoh ka nongbah Kremlin ha ka sngi ba la leit.
Katei ka jingkyntait jong ka White House ka long hadien ba u Dmitry Peskov jong ka Russia, u la kynnoh ia ka United States halor ka jingai mynsiem bad ai jingkyrshan ia ka Ukraine ba kan leit ban thombor ia u Putin ha katei ka jingjia.
Kumta ruh ka United States ka la ong ba kam shym don jingthmu eiei ban ai mynsiem ne ban kynshoit ruh ia ka Ukraine ha kum kitei ki kam bad namarkata ruh ka White House ka la kynnoh kylla ia u Peskov ba u la shu kren lamler tang ban pynbud nam ia ka US.
Ka Russia ha ka Sngi Balang, ka la kynnoh ba ka Ukraine ka phah ia kitei ki drone sha ka jaka sah jong u Putin, da ka jingthmu ban thombor bad ban shim syndon ia ka jingim jong u ha ka miet Sngi Ba-ar.
Hynrei u Peskov, u la ong ba kum kitei ki rai, kim dei na ka Ukraine, hynrei ki long ki jingthmu bad jingai jingkyrshan na United States. Kumta ruh u la ong ba ka Ukraine ka shu leh ia kaei kaba la bthah ia ka.
Katei ka jingjia ka long hadien bun tylli ki jingbthei hapoh ki thaiñ kiba long ki jong ka Ukraine hynrei kiba la shah knieh noh ha ka Russia.
Kumta, la ong ba ki heh ka United States haba kren bad ki lad pathai khubor ha ka Sngi Balang, ki la pynpaw ba kim shym don jingthmu bad kim shym don bynta eiei ha katei ka jingthmu thombor ia u President ka Russia.
