Helsinki, Jymmang:
U President ka Ukraine, u Volodymyr Zelensky ha ka Sngi Balang u la kyntait war halor ka jingpharep jong ka Russia ba dei ma u, uba phah thombor ban shim ia ka jingim jong u President ka Russia, u Vladimir Putin. Kane ka wan jia ha kaba ki shipai ka Russia ki la ioh ban siat pynhap ia 2 tylli ki drone kiba thmu ban leit thombor ia u Putin hapoh ka nongbah Kremlin.
Kumta, u Zelensky ha katei ka sngi u la ong ba ka Ukraine kam shym don jingthmu eiei ban thombor ne ban shim ia ka jingim jong u Putin, namar ka Ukraine ka dang iakhun shitom katba lah ruh ban iada ia la u jong u pud u sam na ka jingwan tur jong ki shipai ka Russia shapoh Ukraine.
Shuh shuh ruh u Zelensky u la ong ba ka Ukraine kam shym la leit thombor ia u Putin lane ia ka Moscow, namar kam da don bun ruh ki tiar ba kan leh ia kata.
Ka Russia ha ka Sngi Balang, ka la pyntip ba ka la ioh ban siat pynbthei noh ia 2 tylli ki drone kiba leit poi sha ka jaka sah jong u President ka ri ha Kremlin, ha kaba ka Russia ka la kynnoh bad ong ba katei ka long ka jingthmu thombor jong ki lehnoh Ukraine.
Wat la katta, la ong ba ka long kaba donbok ba ki bor pahara ki la lah ban siat pynbthei noh ia kitei ki drone bad ia mynta hi, kam don shuh kano kano ruh ka jingma ia u Putin ne ia katei ka jaka.
