Belgrade, Jymmang:
Katkum ki khubor la iathuh ba 8 ngut ki la khlad bad 13 ngut kiwei pat ki la mynsaw na ka jingshah synreit kuli hajan Belgrade ha ka miet Sngi Palei. Kane ka jingjia ka long tang hadien shi sngi ka jingkhlad jong ki 9 ngut na ka jingshah siat hapoh ka Elementary School ha Serbia.
La ong ba ha katei ka miet, uwei u runar ha ryngkat bad ki atiar kiba u la kit bad kieng ialade, u la leit poi ha katei ka jaka hajan Mladenovac bad u la synreit kuli napoh jong ka kali ba u shong sha katei ka jaka ba iabun briew bad hadien kata u la phet krad noh na katei ka jaka.
Tat haduh jong ka step Sngi Thohdieng, ki pulit ki dang thwet bad bud dien ia utei u runar katba ki dang wad bniah ia ki jingtip shaphang jong u. Kumta ruh ha katei ka miet, ki bor pyniaid ki la pyntip sha ka tnat ba dei khmih bad la phah ruh da ki ‘helicopter’ ban swait kylleng sawdong jong katei ka thaiñ, ha kaba la ker kut noh ruh ia katei ka thaiñ baroh kawei.
Ki pulit ki la khang kut noh ruh ia ka surok ka ban leit sha ki shnong Malo Orasje bad sha Dubona, kum shi bynta ban ker kut ia utei u runar lada u pyrshan ban mih bad phet noh na katei ka thaiñ.
Kumta, la ong ba ki bahaiing hasem jong kitei kiba khlad bad kiba mynsaw baroh, ki la pynpaw ka jingsngew khia kaba jur halor jong katei ka jingjia ka bym poi pyrkhat bad naba kim shym la don jing-ithuh eiei ruh ia utei u runar uba la synreit kuli sha ki ha katei ka miet.
Ki bor pyniaid ki la pynrem jur halor katei ka jingjia bad ki la ong ruh ba katei ka long ka kam thombor jong ki kynhun ehrang. Namarkata ruh lada ioh ia utei u runar, yn pynngat ia u hapoh ki kyndon pynkheiñ aiñ katkum ki jingleh pynkheiñ aiñ jong u hi.
La ong ruh ba ka Balkan ka la ioh mad lypa ia shibun tylli ki jingjia synreit kuli ba shyrkhei ha kawei ka skul ha ka Sngi Balang, ha kaba uwei u khynnah 13 snem u la siat iap ia 8 ngut ha katei ka skul.
