Shillong, Jymmang 05:
Ka Police Control Room bad ka NEHU Shillong ki la khur ïa ka jingjop ha ka SCA Inter Office League 2022-23 ha ka sngi Thohdieng.
Ha kane ka jingïakhun, ka NEHU Shillong ka la pynliem noh ïa ka MeECL da 31 run. Ka NEHU Shillong hadien ba jop ïa kynting pisa ka la kam trai shwa ban tied nyngkong, bad ka la kamai 118 run na bynta ban shah pynhap 7 wiket ha ki 20 over. Ki nongtied kiba ïalehkai bha ki long u Wallam Kharbithai uba la ïoh 47 run na ki 51 bol bad u Manik Das u la ïoh 17 run na ki 22 bol. Katba ki nongkawang bol kiba ïalehkai bha ki long u Mebanpynshai Warjri bad u B.S Rawat kiba ïoh khur mar 2 wiket na ka bynta ka MeECL.
Haba wan beh ïa ka thong, ki nongtied ka MeECL ki la shah pynkhyllem baroh na ka bynta ban kamai tang 87 run ha ki 16.2 over. U Mebanpynshai Warjri u la tied 28 run na ki 23 bol bad u Sandy Swer u la ïoh 17 run na ki 22 bol. Katba u Nantu Das u la khur 3 wiket bad ïa ki 2 wiket la khur da u Gino Sangma. Ïa ka nam ‘Man of the Match’ la khur da u Nantu Das.
Haba phai sha kawei pat ka jingïakhun ba ar, ka Police Control Room ka la pynliem noh ïa ka Shillong Bar Association da 5 wiket. Ka Shillong Bar Association ka la shimti shwa ban tied nyngkong ha kaba ka la kamai 115 run bad shah pynhap 7 wiket ha ki 20 over. U Dapborlang Nongkynrih u la tied 28 run na ki 23 bol bad u Sujit Dey u la ïoh 25 run na ki 27 bol. Katba u Wanaibok Basaiawmoit bad u Balario Rynshon ki la khur mar 2 wiket na ka bynta ka Police Control Room.
Haba wan shimti ïa ka pali ba ar, ka Police Control Room ka la kynjoh sha ka thong da kaba kamai 117 run bad shah pynkhyllem 5 wiket ha ki 17.2 over. U Jason Wahlang u la tied 53 run na ki 46 bol bad u Tushan Marak u la ïoh 18 run na ki 18 bol. Katba u Hamid Shotun u la khur 3 wiket bad ïa ka 1 wiket la khur da u Reuben A. Najiar. Ïa ka nam ‘Man of the Match’ la khur da u Jason Wahlang.
