Mynta ka la shai kdar ba ki arngut ki MLA ka People’s Democratic Front (PDF), u Bah Banteidor Lyngdoh uba mihkhmat ïa ka Mawkynrew bad u Bah Gavin Mylliem uba mihkhmat ïa ka Sohra, kin leit pynïasoh noh sha ka National People’s Party (NPP) ha ka 6 tarik Jymmang, 2023. Dang ha ka 2 tarik Lber, 2023, kine baroh arngut ki la shah jied biang ha ki paidbah kum ki MLA ka seng PDF. Hynrei tang hadien ar bnai, ki la rai ban leit pynïasoh noh bad ka seng saiñpyrthei kaba bun paid tam kaba la don lypa 26 ngut ki MLA. Ka jingleit jong u Bah Banteidor bad u Bah Gavin kan pynskhem bad pynkhlaiñ ïa ka NPP kaba ïalam ïa ka sorkar Meghalaya Democratic Alliance (MDA) 2.0. Lehse, ka NPP ka la kwah ba kine ki arngut ki dei beit ban pynïasoh sha ka seng katto katne sngi hashwa ba ki paidbah ka Sohïong konstitwensi kin ai ïa ka rai ïano kin pynlong MLA napdeng ki hynriew ngut ki kyrtong. Tharai ki paidbah ka Sohïong kin pynshong nongrim ïa ka jingjied ïa u MLA bathymmai halor ka jingleit pynïasoh jong ki arngut ki MLA ka PDF sha ka NPP?
Da ka jingleit jong kine arngut ki MLA ka PDF, ka jingkylli ka long ba hato ka NPP kan ai jaka sah ïa ki seng saiñpyrthei kum ka United Democratic Party (UDP), Bharatiya Janata Party (BJP), bad ka Hill State People’s Democratic Party (HSPDP) ban don ha ka sorkar synrop? Ka BJP ka dei ka banyngkong tam ban leit tyrwa jingkyrshan ïa ka NPP hadien ka jingñiew ‘vote’ ha ka 2 tarik Lber. Hadien ba ka UDP, PDF, HSPDP, Congress, Trinamool Congress bad ka Voice of the People Party (VPP) ki khlem lah ban pynwan dur ïa ka sorkar bathymmai, ka HSPDP ka la mih noh ban leit ai jingkyrshan ïa ka NPP bad la bud sa ka PDF bad ka UDP. Ka ju long ka rukom ba yn hap ban burom ïa kiba wan hashwa ban ïa kiwei. Lehse ka NPP kan ym weng ïa ka BJP namar ka donkam ïa kane ka seng kaba bat ïa ka jingsynshar ha New Delhi. Tangba kam don jingeh lada ka weng ïa ka UDP kaba don 11 ngut ki MLA bad kaba la ïoh haduh arngut ki Myntri ha ka sorkar MDA 2.0. Da kaba weng noh ïa kine arngut ki Myntri na ka UDP, ka NPP ka lah ban ai jingmyntoi ei ïa ki MLA lajong.
Lada kheiñ ïa ka jingdon ki MLA ha ka sorkar MDA 2.0, ka NPP, ka ban sa don 28 ngut ki MLA, ka la biang pura tang na ka jingkyrshan ki arngut ki MLA ka HSPDP, arngut ki MLA khlem seng (Independent), bad arngut ki MLA ka BJP. Kine baroh ki don 34 ngut ki MLA bad namarkata u Conrad K Sangma um donkam eiei shuh ïa ki 11 ngut ki MLA ka UDP. Da kaba suk u lah ban weng ïa ki arngut ki Myntri na ka sorkar MDA 2.0 bad ban ai jaka ïa ki MLA lajong. Tangba un leh kumta? Ka don ka jingong ba ha ka jingim dei ban kham pynïajan sha ki nongshun ban sha ki paralok. Lada u Conrad u bud ïa kane bad ban lait na kane katai, lehse u Conrad un ym weng ïa ka UDP na ka sorkar. Un pynshong beit ïa ki haduh kaba kut jong ka san snem. Lehse na ka liang ka NPP, ba kan nang khlaiñ shuh-shuh, kan pyrshang ruh ban tan ïa ki MLA kiba na kiwei pat ki seng kumba ka la leh ïa ki MLA ka PDF.
Ha kawei pat ka liang, ka long kaba ma lada la khlaiñ than shiliang. Ngi la ïohi ïa kaei kaba jia namar ka jingkhlaiñ palat jong kawei ka seng ha ka Sorkar Pdeng. Namarkata, ki MLA kiba don ha ka liang pyrshah kin hap ban trei shitom ban peit ba ka sorkar kam dei ban leh katba ka sngewbit. Na ka liang ki paidbah ruh kin hap ban long kiba husiar bad peitngor. Ynda ka bor ka shong than tang ha uwei u briew na ka kynhun, ki jingma ki ap lypa namar kita kiba don bor ki sngew ba ki lah ban leh katba ki mon ïa kiwei ki bym don lang ha kajuh ka sem. Katba ngi dang don bad im ha ka Ri synshar paidbah, ngim dei ban ailad ïa kiba don ha ka bor ba kin synshar katba ki sngewbit khlem da sngap shuh ïa ka sur jong kiwei. Ngin hap ban ïa peit kaei ka ban jia nangne shakhmat tangba ka long kaba donkam ban husiar. Ka dor kaba ngi siew na ka bynta ka jinglaitluid kaba ngi ïoh, ka dei ka jinglong peitngor baroh shirta.
Ki jingkylla ha ka saiñ hima sima ha ka jylla ka lah ban nang kylla ha ki sngi bad ki por ki ban wan. Ngi shu kyrmen ba ki jingkylla kin long beit na ka bynta ka jingbha bad ym na ka jingsniew sha kaba kham sniew. Ka jylla ka dang donkam bun kiei-kiei bad ki MLA lem bad ki seng saiñpyrthei ki dei ban pynleit jingmut ruh ban ai ïa ka synshar ka khadar kaba bha tam khnang ba kan long ka jingmyntoi ïa ki nongshong shnong baroh.
