Shillong, Jymmang 05:
Ka Shillong Lajong FC kan pynkhreh ïa ka jingïalehkai ba nyngkong na ka bynta ka wat ba khatduh (final round) jong ka Second Division League pyrshah ïa ka United SC ha ka sngi Saitjaiñ ha Shillong Sports Association (SSA) Stadium kaba ha Polo.
Wat la katei ka madan ha First Ground ym pat shym lah ban pyndep ha kine ki sngi kiba la dep, hynrei da ka jingpynbna ka All India Football Federation (AIFF), ki nongtrei ïa katei ka madan ki la pynstet ïa ka kam da kaba trei miet la bad sngi na ka bynta ban pyndep noh shi sngi shwa ban sdang ka jingïalehkai ba nyngkong jong ka Shillong Lajong ha la ïing.
Kumba ka paw kine ki kynhun ki la ïoh rung sha kane ka wat ba khatduh hadien ba ki la lah ban ïalehkai bha ha ka Group-B jong ka lympung ïaknieh. Ka United SC na kane ka group ka la ïoh ban lamkhmat da kaba khur 14 dor-thong (point), katba ka Shillong Lajong ka la wan ba-ar da kaba kamai 13 point.
Kumba ka paw kane ka long ka sien ba nyngkong eh ban pynlong biang ïa ka jingïalehkai phutbol ha madan First Ground hadien kumba lai snem eiei ym shym la lah ban pynlong da ka daw ka jingthut ka madan bad mynta ka kynti ka Shillong Sports Association (SSA) kan sa lah ban bteng biang ïa ki jingïalehkai ha kane ka madan.
Kumba ka paw ha kane ka lympung ïalehkai Second Division League, man la kawei-pa-kawei ka klob kan hap ban ïalehkai mar ar sien ha la ïing bad ar sien pat shabar. Ki ar tylli ki kynhun ki ban wan ha ka kyrdan ba hakhlieh kin kiew kyrdan sha ka I-League.
Hashwa ban sdang kane ka jingïalehkai kaba nyngkong ha kane ka nongbah, baroh ar tylli ki kynhun ki la ïoh ban kilanmet ha ka sngi Thohdieng ha katei ka madan na ka bynta ban pynkhreh ïa katei ka jingïakhun ha ka sngi kaba bud.
