Johannesburg, Jymmang:
Na ka liang jong ka synjuk pyniaid jingialehkai Kriket ka ri South Africa ka Cricket South Africa (CSA) ka pynbna ba kynhun ialehkai na Australia ka pynkhreh mynta na ka bynta ka jingleit iakhun sha katei ka ri naduh ka 30 tarik u Nailar haduh ka 17 tarik u Nailur 2023 na ka bynta ki lai tylli ki jingialehkai T20Is bad san tylli ki jingiakhun ODIs. Kane ka long ruh kum shi bynta jong ka jingpynkhreh jong ki na ka bynta ka ODI World Cup ka ban sa long ha India naduh u Risaw haduh u Naiwieng.
Kumta ha kaba iadei bad kitei ki jingialehkai, ka madan Kingsmead kaba ha Durban kan pynkhreh mynta na ka bynta ban pynlong ia baroh ki jingialehkai ka T20Is ha ka 30 tarik u Nailar, 1 bad 3 tarik u Nailur. Ka Australia kan pynkhreh mynta kum ka kynhun hapoh ka jingialam u kapten ba thymmai hadien ka jingshongthait noh u Aaron Finch mynta u snem na ka kam ialehkai Shabar-ri. Shuh shuh ruh ki san tylli ki jingialehkai ODIs kin iai tyllun ha Mangaung Oval kaba ha Bloemfontein ha ka 7 & 9 tarik u Nailur kata ha shuwa ka jingiakhun ODIs kaba lai ia kaba yn pynialehkai ha JB Marks Oval ha ka 12 tarik u Nailur 2023.
Kitei baroh ar kynhun ialehkai kin leit ruh sha SuperSport Park na ka bynta ka jingiakhun ia ka ODIs kaba saw ha ka 15 tarik u Nailur ha ryngkat bad ka jingiakhun phainal jong ka jingialehkai 50 over yn pynialehkai ha Wanderers Stadium ha ka 17 tarik u Nailur. Ka long ruh ka sien kaba nyngkong ha kaba ka South Africa ka pdiang sngewbha mynta ia ka Australia kata naduh u snem 2020 ha ka por ba ka SA ka la lah ban khyllie biang sa shisien ialade na ka 2-1 T20I jingshah rem ka jong ka na ka bynta ban pynliem noh ia ka Aus da 3-0 ha ka jingialehkai ODIs.
Haduh mynta ka South Africa kam shym la long ka kynhun ka ban shah jied na ka bynta ka ODI World Cup hadien ba ka lah weng noh ialade na ki lai jingialehkai pyrshah ia ka Australia ha u snem ba lah dep ha u bnai K’lyngkot na ka daw jong ka jingiatyngkhuh ka prokram ialehkai bad ka lympung ialehkai ba thymmai jong katei ka ri ka SA20 League. Kumta ruh ka jingshah jied na ka bynta ban ioh rung beit sha ka lympung ialehkai ka shong ha ka Ireland kaba lah shah rem ha kawei na ki lai jingialehkai ODIs pyrshah ia ka Bangladesh ha ka taiew ban wan.
Hynrei lada ka Ireland ka rah ia ka jingjop da 3-0, ka South Africa kan sa hap ban ialehkai ia ka rynsan ialehkai na ka bynta ka jingshah jied ha Zimbabwe ha u bnai Jylliew- Naitung. Ka long ruh ka jingsdang jong ka aiom ialehkai bar-ri na ka bynta ka SA bad ka long khamtam eh kaba donkam na ka bynta ka jingiaid lynti ka kynhun ha kiba bun ki bynta namar jong ka ICC Men’s Cricket World Cup ka ban sa long ha India mynta u snem.
Ka SA kam pat ju shah jied haduh mynta na ka bynta ban ia aireng ha ka lympung iakhun ODIs jong ka WC, hynrei kum ka kynhun ka kyrmen skhem ba mynta ka kynti kan ioh ban rung sha ka lympung bad ban ia iareng ruh bad ki kynhun ialehkai kiba paw ha ka pyrthei ynda ia ka lympung ialehkai baroh kawei yn pynialehkai ha u Risaw bad Naiwieng.
