Madrid, Jymmang:
Ka khlur ialehkai tennis na Poland kaba bat ia ka kyrdan ba 1 ha ka pyrthei ka Iga Swiatek ka lah mih shakhmat biang sa shisien na ka bynta ka jingiai synshar jong ka ha ka rukom ialehkai na ka bynta ban ioh buh jaka ialade ha ka sien balai sha ka rynsan iakhun phainal jong ka lympung ialehkai ba mynta ka Madrid Open. Kane ka wan urlong hadien ba katei ka nongialehkai ka la rah ia ka jingjop kaba seisoh pyrshah ia ka Veronika Kudermetova.
Ha ka jingiakhun semi final hapdeng kitei arngut, ka Iga ka la ioh ha lade ban pyniaid na khmat ia ka jingiakhun baroh kawei ha kaba nyngkong ha baroh ki ‘set’ iakhun bad kaba lah iai pyntyllun ka rukom ialehkai jong ka na ka bynta ban aiti sha katei ka nong-iakhun pyrshah ia ka 6-1, 6-1 jingshah rem ka jong ka ha ka jingiakhun semifinal ka jong ki.
Ka Iga ka lah shimpor ruh haduh 1 kynta bad 19 min na ka bynta ban paw kum kaba nyngkong ha katei ka lympung ialehkai ba mynta jong ka WTA 1000 ka aiom ba mynta da kaba iai pyntbit shuh shuh ia ka jingiai synshar ialehkai ka jong ka ha katei ka jingiakhun pyrshah bad ka Kudermetova na ka bynta ban khur ia ka rekod sha ka 4-0.
Ka khubor ka iathuh ruh ba ka Swiatek kam pat shym la mad ka jingshah pynrem palat ban ia ki hynriew jingialehkai ha ka jingiakhun pyrshah bad ka Kudermetova. Kumta da katei ka jingjop ba seisoh ka jong ka, ka Swiatek ka lah rah ia ka jingjop lynter kaba ar ha ka lympung leit iakhun sha ka WTA Tour, ha kaba ka tei ka nongialehkai kan hap ban pynkhreh ruh na ka bynta ka jingiakynduh pat sa bad ka Aryna Sabalenka ha ka phainal; hadien ba ka Sabalenka ka la lah ban khur ia ka jingjop ha ka sngi ba nyngkong jong ka jingiakhun semifinal pyrshah ia ka Maria Sakkari.
Katei mynta kan long ruh tang kum ka sien kaba lai ha ki 40 snem ba lah leit noh ba ka Iga bad ka Aryna kin iakynduh paramaki arsien ha kum katei ka lympung ialehkai ha khyndew-saw ha ka por jong ka shi aiom ialehkai; ha kaba ka lah jia teng ruh ha u snem 1984 (Martina Navratilova & Chris Evert ha Amelia Island bad ha Roland Garros) bad ha u 2013 (Serena Williams & Maria Sharapova ha Stuttgart bad Roland Garros).
Kan long ruh ka sien kaba nyngkong ha kaba ka nongialehkai ba bat ia ka kyrdan ba nyngkong ha ka pyrthei bad kaba bat ia ka kyrdan ba-ar kin ioh ban iakynduhlang para maki ha ka jing-iakhun phainal jong ka WTA 1000, kata naduh ka por jong ka Serena Williams kaba bat ia ka kyrdan ba nyngkong ka la lah ban pynliem noh ia kaba bat kyrdan ba-ar ka Li Na na ka bynta ban rah ia ka trophy jingjop ha ka Miami Open 2014.
