New Delhi, Jymmang:
Katkum ka khubor ba la ioh lum ka iathuh ba u nongtied ba pawnam jong ka kynhun ialehkai Kriket ka ri u KL Rahul u pynbna mynta ba un sa hap ban weng noh ialade na ka bynta ban iadonlang bad ka kynhun ialehkai baroh kawei ka ban sa ia aireng ha ka lympung World Test Championship (WTC) ha ka jing-iakhun phainal pyrshah ia ka Australia namar un hap ban leit shah sumar bad shah puid ka kjat na ka jingmynsaw.
Ka khubor ka iathuh ruh ba u Rahul uba long u kapten jong ka kynhun ialehkai IPL ba mynta ka Lucknow Super Giants, u lah hap ban weng noh ialade wat na ka lympung iakhun kaba mynta khlem kano kano ka jingbuh por na ka daw jong ka jingmynsaw ha ka por ba u dang ialehkai ha katei ka lympung pyrshah ia ka Royal Challengers Bangalore.
Kumta ruh katei ka lympung ialehkai ka ban sa long, ka WTC yn sa pynialehkai ha Oval; London naduh ka 7 tarik u Jylliew.
