Shillong, Jymmang 07:
Ka Shillong Lajong Foot-ball Club ka la sdang ïa ka jingïalehkai jong ka lympung Second Division League ka All India Foot-ball Federation da ka jingjop hadien ba ka la lah ban pynliem noh ïa ka United Sports Club kaba na Kolkata da 2-1 kol ha ka jingïalehkai kaba la long ha ka sngi Saitjaiñ ha madan SSA Stadium, ha Polo, Shillong.
Kine baroh 3 tylli ki kol, ki la wan lut ha ka kylla step jong ka jingïa-khun, kata ïa ki ar tylli ki kol jong ka Shillong Lajong la ïoh ban khyrwit da u Hardy Cliff Nongbri ha ka minit kaba 33 bad u Figo Syndai ha ka minit kaba 45’+2 katba ïa ka shi kol jong ka United SC pat la thep da u Sajib Mondal ha ka minit kaba 38.
Kine baroh ar tylli ki kynhun, kiba dang khmih lynti ban ïoh rung biang sha ka lympung I-League, ki dei kiba la dep ban ïakynduh haduh ar sien shwa kane ka jingïalehkai ha ka group stage jong ka jingïaknieh rung sha kane ka lympung, ha kaba ka jingïakhun ha Shillong ka la kut ha ka jingïakhaid, katba ka Lajong ka la shah rem noh ha ka jingïakhun ha Kolkata.
Ka United SC ka la ïoh rung sha ka final round hadien ba ka la don hakhliehduh ka miej ïakheiñ point ha ka Group-B, katba ka Shil-long Lajong pat ka la ïoh rung kum ka ‘best second-placed club’ napdeng ki saw tylli ki group.
Kane ka jingïalehkai kan dei ruh kaba nyngkong eh ban ïalehkai ha ka madan jong ka Shi-llong Sports Association Stadium kaba ha First Ground hadien ba la dep ban siang da u phlang plastic.
Ha kane ka jingïa-khun, na ka liang jong u Coach ka Lajong u Bobby Lyngdoh Nongbet u la bujli tang uwei u rangïalehkai na ka kynhun kaba la jop da 5-0 kol ïa ka East Bengal Reserves ha ka jingïalehkai ba khatduh jong ka group, da kaba wanrah ïa u Figo Syndai ha ka jaka jong u Amon Lepcha.
Na ka liang jong ki rangïalehkai ka United SC kin sa ïai kynmaw ïa kane ka jingïalehkai namar ka jingpynlehnohei ïa kiba bun ki kabu ksiar ba ki la ïoh bad khlem lah pynurlong.
Ka kol kaba la thep da u Nongbri ka la wan lyngba ka jingshut free-kick, kaba la pynshoh biej ïa ki nongkyrshan kiba la wan ban ai mynsiem ïa la ka jong ka kynhun, ha kaba u nongap kol ka United um shym la lah ban leh eiei hynrei ban shu peit kai ïa ka bol kaba la rung jlang shapoh ka kol.
Na ka liang ka United ruh ka la pynphai ïa kane ka shi kol lyngba ka free-kick kaba kham itynnad shuh shuh, ïa kaba la shut da u Mondal.
Hadien kane ka jingjop, mynta ka Lajong kan ïoh por san sngi shwa ban ïakhun ha kawei pat ka jingïalehkai, ka ban long ha ka 11 tarik mynta u bnai pyrshah ïa ka Delhi Football Club.
