Kathmandu, Jymmang:
Ha ka Sngi Thohdieng, kawei ka liengsuiñ ‘Helicopter’ jong ki riew shimet na Nepal, ka la leit hap bakla hashwa ba kan hiar khyndew noh ha ka thaiñ Mihngi jong katei ka ri. Ha kane ka jingjia, uwei u la khlad noh bad 4 ngut kiwei pat kiba iashong lang ha katei ka liengsuiñ, ki la mynsaw jur, kynthup ia u nongñiah jong katei ka liengsuiñ.
Kane ka la jia hajan ka wah Bhotekhola kaba don hapoh jong ka distrik Sankhuwasabha, katba katei ka helicopter kaba kit ia 5 ngut ki briew, ka dang thmu ban leit rah ia ki tiar ba donkam naka bynta ka jingpyntrei ia ka ‘Hydro Project’ ha katei ka wah.
Ia utei uba la khlad noh la ithuh kyrteng u Bhawin Gurung uba dei jong ka Simrik Air Helicopter, bad u la khlad noh tang hadien khyndiat por hapdeng ka jingsumar namar jong ki jingshitom ba la jur.
Nalor jong utei uba la khlad noh, kitei kiwei pat ki 4 ngut kiba la mynsaw ki kynthup ia u Captain Surendra Paudel, u Tshering Bhote, u Manoj Thapa bad u nongtrei jong ka Nepal Electricity Authority u Bikram Shankar.
Ki heh ki la iathuh ba katei ka helicopter ka la leit hap hajan jong ka wah Bhotekhola, katba ka dang thmu ban leit hiar ha katei ka jaka hapoh jong ka distrik Sankhuwasabha.
Shuh shuh ruh la iathuh ba napdeng jong kitei ki 4 ngut kiba mynsaw, 2 ngut ki dei kiba la mynsaw jur bad kiba la don hapdeng jong ka jingma watla ki la lah ban pynpoi noh ia ki mar-mar sha ka jaka sumar ha ka por kaba biang.
La ong ba katei ka helicopter ka dei kaba dang leit ban kit ia ki tiar ba donkam jogn ka Upper Arun Hydro Project, kaba dang don hapdeng ka jingpyntrei jong ka kompeni Nepal.
