Shillong, Jymmang 07:
Ka samla Lorenza Songthiang ka la ïoh khur ïa ka takma rnong na ka bynta ka India ha ka lympung kaba la tip kum ka Pankration World Championship kaba la long ha Tashkent, Uzbekistan naduh ka 2 tarik haduh 4 tarik mynta u bnai.
Kane ka jingïalehkai Pankration ka dei kaba ïadei dur bad ka jingïalehkai mixed martial arts jong kane ka juk kaba mynta, wat la ka kyrteng jong ka, ka dei kaba la buh naduh ki por hyndai hynthai.
Ka samla Songthiang, kaba dei kaba dang pule kolej ha ka ‘fourth semester’, ka dei kawei na ki khyndai ngut ki nong India ban ïashim bynta ha kane ka lympung, ha kaba ka India ka la jop haduh saw tylli ki takma rnong.
Ka samla Songthiang ryngkat bad uwei pat u nongïakhun na ka Ri, ki la ïoh rung bad shah jied na ka bynta ka lympung World Combat Games ha ka Pankration, ka ban long ha Riyadh, Saudi Arabia ha u bnai Risaw mynta u snem.
