Bengaluru, Jymmang:
Katkum ka khubor ba la iathuh da ka synjuk ba ha khlieh duh ha ka pyrthei jong ka jingialehkai iakob niah Saikel ka Union Cycliste Internationale (UCI), ka long ba katei ka synjuk kan sa shah mynta ia ki nongialehkai na ka ri Russia bad Belarus ba kin shim bynta ha ki lympung ialehkai bar-ri, hynrei pat kum ki kyrtong ialehkai kiba pdeng (khlem sha kano kano ka liang) hadien ba ki nong-ialehkai ki lah shah khang ban shimbynta ha ki lympung iakhun naduh u snem ba lah dep.
Na ka jinghiar thma jong ka ri Russia pyrshah ia ka Ukraine ha kaba ka ri Belarus ka lah shah pyndonkam kum kata ka ri ka ban kyrshan nadien ia ka Russia ha ka jinghiar thma ka jong ka, kiba bun na ki synjuk bapher bapher ha ka pyrthei ki lah pyntreikam ruh ia ka jingmynjur bad ka jingbthah da ka International Olympic Committee (IOC) na ka bynta ban ym shah ialehkai ia ki nongialehkai jong kitei ki ar ri ha kino kino ki lympung iakhun. Hynrei ha u bnai ba lah dep, ka IOC ka lah pynkylla khongpong noh ia kata da kaba bthah bad pynpaw ba ki nongialehkai jong kitei ki ar ri yn shah noh ia ki ban wanphai biang sha ki kam ialehkai ha ki lympung bapher bapher kum ki kyrtong iakhun ki bym shym la hap sha kano kano ka liang jong ki ar ri. Ia ki nongialehkai yn shah ban shimbynta ha ki jingialehkai tang lada kim don sha kano kano liang ne ka jingiadonbynta ka jong ki ne kano kano ka jingiadei bad ka Russian Federation ne bad ka Republic of Belarus, ki National Federation jong ki ne bad ka National Olympic Committee jong ki ar ri.
Katei ka synjuk ka iathuhruh ba kan iai pynneh ia ka jingkhang ia ki rynsan ialehkai ha Russia bad Belarus bad ruh ha ki shab jong ki ar tylli ki ri kaba kynthup naduh ki lama bad ki jingrwai ieid-ri na ka bynta ban pyndonkam ha ki lympung ialehkai jong ka UCI.
Shuh shuh ruh ki jingialehkai Table tennis, Pentathlon, Fencing, Judo, Taekwondo, Archery bad Canoeing ki long napdeng kiwei pat ki jingialehkai Olympic kiba lah shah biang sa shisien ia ki nongialehkai jong kitei ki ar ri ban shimbynta ha ki lympung ialehkai bapher bapher ha kylleng ka pyrthei.
