Melbourne, Jymmang:
Katkum ki khubor la ong ba kawei ka jaka mane Hindu kaba don ha Sydney, ka la shah pynpra noh ha ka Sngi Thohdieng wat hapdeng ka jingap khmih lynti ia ka jingleit jurip jong u Myntri Rangbahduh ka India- u Narendra Modi ha ki khyndiat por ki ban wan jong une u bnai.
Kane ka la jia ha ka BAPS Shri Swaminarayan Mandir kaba don ha Rosehill jong ka Sydney. Watla katta, ym shym la tip shai pat ia ka por ha kaba katei ka jingjia ka la jia.
Ki bor pyniaid jong katei ka jaka mane ruh ki la lap ia ki lama Khalitan kiba la pyndait bad the ha ka phalor ban rung shapoh jong katei ka jaka mane bad kumta ki la leit ban pyntip sha ka tnat pulit New South Wales (NSW) ha katei hi ka sngi.
Haba iadei bad kane, ki bor pyniaid jong ka Sydney ki la pynpaw ka jingsngewkhia halor katei ka shah leh ibeiñ jaitbynriew jong ki jaitbynriew Hindu ha katei ka jingjia.
La ong ruh ba ki jakamane Hindu ki la shah thombor bad shah pynjulor na ka por sha ka por hapoh Australia, watla katei ka jaka mane BAPS Swaminarayan Mandir ka long kaba la neh slem la kumba 23 snem mynta, ha kaba katei ka jakamane ka ju long ruh ka jaka nguh- jaka dem ia ki paid Hindu kiba im ha katei ka ri.
Kumjuh ruh ki dkhot jong ka ïingdorbar thaw aiñ ki la leit mar-mar ban leit jurip sha katei ka jaka tang mar ia ioh jingtip hi halor katei ka jingjia ibeiñ jaitbynriew.
