Nongstoiñ, Jymmang 08:
Ki 9 tylli ki shnong ha ka thaiñ Rambrai kiba kynthup ïa ka Mawthaw, Umsiej, Urkhli, Mawmluh, Mawliehpoh, Mawiawniang, Marshiang, Nongshilliang bad Lawdibah ha ryngkat ka jingdonlang ruh ka FKJGP bad KSU Rambrai Circle ki la pynpaw ïa ka jingpyrshah kaba jur halor ka jingsuba tih marpoh khyndew ïa kaba ym shym la tip u dei uei ha kawei na ki jaka ha Mawlangria.
La ong ruh ba ka daw jong ka jingpyrshah halor kane ka jingtih marpoh khyndew na katei ka jaka ka dei namar ka jingkylla rong saw lam khleiñ kynsan ka umdih ba la tan na ki tyllong um kiba don hajan katei ka jaka tih marpoh khyndew kaba ki nongshong shnong kim lah shuh ban dang pyndonkam ïa katei ka um bam kat haduh mynta.
Halor katei ka bynta, kitei ki shnong ha ryngkat bad kitei ki seng ki la ïoh ruh ban pynlong ïa ka jingïalang pyrshah ha Mawlangria, Mawiawtep Rambrai kaba la long ha ka sngi Nyngkong ka taïew.
Katkum ka jingïathuh ki nongshong shnong ba ka um ka la pher wat ha ka jingmad. Kumta da kawei ka jingmut ha katei ka jingïalang la rai ban dawa na u Deputy Commissioner jong ka West Khasi Hills District ba un phah pynsangeh mardor ïa katei ka jingtrei hapoh 48 kynta. Lada na ka liang jong u khlieh ka District um leh eiei hapoh kitei ki kynta ban kyndang noh ïa katei ka jingpyntrei, ki paidbah ha ryngkat ka FKJGP bad ka KSU kin sa shim da ki sienjam kiba kham tyngeh.
Ha katei ka sngi nalor ki paidbah, ki nongïalam shnong jong kitei ki shnong la don lang ruh u Bah Robert Wahlang, Chief Organising Secretary ka FKJGP Rambrai Circle bad u Bah P Basaïawmoit, Vice President ka KSU Rambrai Circle.
