Nongstoiñ, Jymmang 08:
Ha ka Lah Sngi U Blei jong ka taïew, ka FKJGP bad KSU jong ka West Khasi Hills District ki la hiar sha ka shnong Noapara ban jurip halor ka jingleit sieh jubor lane thung mawpud da ka Sorkar Assam ha katei ka shnong bad Dronpara khlem ka jingtip jong ki bor shnong.
Ha katei ka sngi na ka liang kitei ki seng ki la ïoh ruh ban ïakynduh ïa ki rangbah shnong jong ka Noapara, Komphaduli, Dronpara bad kiwei kiwei ki shnong ha ka thaiñ ban ïaphylliew jingmut bad wad bniah halor ka jingwan thung beaiñ jong ka sorkar Assam ïa ki mawpud.
Nalor kata, ha katei ka sngi ka la don ruh ka jingïalang lyngkot ha ryngkat bad ki rangbah shnong, kiba la pynpaw ba ka sorkar Assam man ka por ka ïai pynthut ïa ki nongshong shnong da kaba ki knieh wat ïa ki mohkhiew, ki wait bad kiwei kiwei haba ki nongshong shnong ki leit trei leit ktah sha ki lyngkha jong ki, bad la ïathuh ruh da ki rangbah ba wat ïa ka pisa ruh ki pulit Assam ki juh pan.
Ka FKJGP bad ka KSU ha katei ka sngi ki la ai mynsiem ïa ki nongshong shnong ba kin don ha syndah jong ki. Ha kajuh ka por ki la kyntu ïa ki trai shnong ka thaiñ ba kin ïeng bad ïaleh pyrshah.
Ha kajuh ka por, ka FKJGP bad KSU ki la pynpaw ruh ba ka sorkar MDA-II kam dei ban shu sngap hynrei ba kan leh da kaba tyngeh ïa ki briew kiba wan ban leh ’riewkhlaw bad ki bym ju burom ïa kata ka ‘status quo’.
Ki la pynpaw ruh da kaba ong, “Kane kam dei ka sien kaba nyngkong ba ka Assam ka kyntur pud, hynrei kaba la ju ïai jia man la ka por.”
Shuh shuh ka KSU bad FKJGP ki la maham ruh ïa ka sorkar Assam ba kam dei ban mushlia than bad ruh ha kajuh ka por ba ka sorkar Meghalaya kan shimkhia, lym kumta kan poi ka por ba kin hap ban mih shakhmat ban ïada ïa la u pud u sam.
