New Delhi, Jymmang:
Ki la don kumba lai ngut ki briew kiba la ïap bad lai ngut kiwei pat ki la mynsaw hadien ba ka liengsuiñ thma jong ka tnat shipai Indian Air Force ka MiG-21 Fighter Aircraft ka la leit hap ha kawei ka ïing briew kaba don ha kawei ka shnong ha Rajasthan, la ïathuh ki heh pulit.
Katei ka liengsuiñ ka la mih na ka kad liengsuiñ kaba ha Suratgarh kumba ka dei ban mih ha ka ban pyndep ïa ki kamram kiba man ka sngi ha kaba ka la hap noh ynda ka la poi hajan Bahlol Nagar kaba don ha Hanumangarh jong ka Rajasthan namar ka jingthut ha ki bor treikam.
U Pilot u la kynthih shwa na ka liengsuiñ ha ka por kaba biang haba u la sngewthuh ba ka la don jingthut ha ka rukom ban ñiah ïa ka liengsuiñ ha kaba la ïoh jingtip ba u khlem lei lei. Ki shipai jong ka tnat Indian Air Force (IAF) ki la ïathuh ba ki Helicopter ki la leit bran bran sha katei ka jaka na ka bynta ban pyllait im ïa u Pilot uba la mynsaw.
“U Pilot u la sngewthuh kumno ban leh lada jia kano kano ka jingbym lah ban treikam shuh ne ym lah shuh ban tehlakam ïa ka liengsuiñ kumta u la kynthih noh khnang ba un lait im, ha kaba u la sngewthuh ba kiei kiei baroh kiba u la pyrshang kim long kam shuh,” la ong ka jingthoh ba la phah da ka tnat shipai.
Kum ban batai bniah halor ka jingjia, la ong ba ki nongshong shnong ki la ïohsngew ïa ka jingsawa jong ka sur kaba jam kaba la hap shapoh khyndew. Tang hapoh khyndiat Second, katei ka liengsuiñ ka la leit hap noh ha kawei ka ïing jong u Ratti Ram, ha kaba kane ka jingjia ka la shim ïa ka jingim jong ka kurim jong u bad arngut kiwei pat ki riewkynthei ïa kiba la tip kyrteng kum ka Leela Devi bad ka Banto Kaur, la ïathuh ka tyllong khubor hadien ba la ïakren bad u heh pulit.
“Ki nongshong shnong ki la pyrshang ban pyllip ïa ka ding kaba la klang da kaba ki la theh um bad shyiap hashaw ban poi ki kali pyllip ding sha katei ka jaka,” la ïathuh shuh shuh u heh pulit.
Shuh shuh ki pulit ki la ïathuh ba ka jingpyntreikam ha ka ban pyllait im ïa ki briew bad ban ai jingïarap ïa katei ka longïing ka dang ïai bteng haduh ba la thoh ïa ka khubor.
