D.H.Kharkongor
Kane ka Sorkar MDA 2.0, kumba long ka MDA 1.0 kaba dang shu dep, ka dei ka Sorkar khleh khawlang ne ka Sorkar Synrop ba la lamkhmat biang sa shisien da ka NPP, ia kaba la kyrshan pynshem biang ruh de sa shisien da ka UDP, ka HSPDP, ka PDF, ka BJP lem bad ki arngut ki kyrtong shimet ne ki ‘independent’. Ka jingiapher ha kane ka kynti ka dei tang ha ka ‘opposition’ lane tang ha ka liang pyrshah, kata, da kane ka jingdonlang jong ka VPP. Ngam artatien ba kane ka Sorkar MDA 2.0, kan skhem bad kan neh tat haduh kaba kut ki san snem, kumba long ka MDA 1.0 kaba dang shu dep.
Naduh kaba sdang ka NPP ka lah don lypa haduh 26 ngut ki MLA katba ka UDP ka don tang 11 ngut. Ka HSPDP, ka PDF bad ka BJP ki don tang mar 2 ngut ki MLA. Ym lah khlem da sngewsynei shisha ia ki, kaba katno tam wei ba ki khlem jop wat tang kawei ruh na ki 24 tylli ki ‘Assembly Constituency’ jong katai ka Ri Lum Garo. Lah ban ong ba ka NPP ka lah da kynjoh mynta sha ka 28 ngut ki MLA, kata, hadien kane ka jingwan jong ka PDF ban ‘merger’ ne ban ia long lang noh kawei bad ka (NPP). Ka NPP ka don ruh ia ka jingkyrmen kaba skhem ba kan jop donburom wat ia ka Sohiong Assembly Constituency. Lada kan long shisha kumta ba ka NPP kan sa kynjoh syndon sha ka 29 ngut ki MLA. Nud ban ong ba ka BJP lem bad ki arngut ki ‘independent’ ne ki kyrtong shimet kin nym iehnoh da lei lei ruh em ia ka NPP. Nud ruh ban ong ba da lei lei ruh em ka BJP kan nym treh ban iehnoh ia ka NPP naba kan nym long bad kan nym lah ban iatreilang la bad ka INC ne bad ka TMC.
Kane ka Sorkar MDA 2.0 ba la lamkhmat da ka NPP kan neh tat haduh kaba kut kine ki san snem. Kan skhem bad kan neh tat haduh kaba kut ki san snem wat lada ka UDP kan jop donburom ia ka Sohiong Assembly Constituency. Ka MDA 2.0 kan skhem bad kan neh tat haduh kaba kut wat lada ka HSPDP ruh kan weng noh ia ka jingkyrshan ka jong ka ia ka MDA 2.0. Ka bapli ka UDP, la ka kob kat ba ka kob, kan nym lah ban thaw pyrthei ei ei ruh em lait na kaba kan leit lam khmat noh ma ka ia ka liang pyrshah, kata, kum ka ‘Leader of the opposition’ kata, ba kan leit ban shong lang noh sha ka liang pyrshah ne ka ‘opposition’ lem bad ka INC, ka TMC bad ruh ka VPP.
Kane ka Sorkar MDA 2.0 ka lah ban kynjoh pynban sha ka 46 ngut ki MLA lada ka NPP kan jop shisha, kumba ka kyrmen skhem, sa ia ka Sohiong Assembly Constituency. Te to ngin ia ap ia ka jingmih (result) jong ka Sohiong Assembly Constituency. Ngin ia ap shitom ia ka 13 tarik ka jong une u bnai, na ka bynta ban ioh ban ia peit kai kaei ka ban jia ia ka UDP. Ngin ia ap ban ia peit kai lada ka UDP, kumba ka kob pia, kan lah shisha ne em ban pynkylla khongpong ne pynkhyllem ia kane ka Sorkar MDA 2.0, kaba katno tam kat ba kan thaw bad kan lamkhmat ia kano kano ka Sokar kaba thymmai, ka ban mihbujli ia kane ka Sorkar MDA 2.0. Ngin ia ap bad ngin ia peit kai mano kita ki Seng Sain pyrthei ki ban ia mih lang noh na kane ka MDA 2.0, kata, ban ia synroplang noh bad ka UDP ha kaba thaw ia kata ka Sorkar ka bathymmai ba yn lam khmat da ka UDP. Te hato ka bapli ka HSPDP kan treh ban mih noh na kane ka Sorkar MDA 2.0, kata, ban iasnohkti da kaba kyrshan noh pynban ia ka UDP ? Ngin ia ap ban ia peit kai ruh de lada ka bapli ka UDP kan nud shisha ne em ban weng noh ialade na kane ka Sokar MDA 2.0, kata, ban weng noh shisyndon ia ka jingkyrshan ka jong ka ia kane ka Sorkar MDA 2.0.
Ngan nym sngewphylla bad ngan nym lah ruh khlem da rkhie pashait lada yn poi pynban haduh u pud ba ka NPP kam banse shuh ban kyndang noh lane phah mihnoh ne beh shi syndon noh ia ka UDP na kane ka Sorkar MDA 2.0. Ngan nym phylla lada ka NPP, kum ka ‘nongkhot ingbasa’,kan beh noh shisyndon ia kano kano ka ‘nongshongbasa’ kaba iai ‘haram namak’ ia kat ki jingleh isnei bad ki jinglehsbun ki jong ka, ia ka bapli ka nongshong basa kaba khlem ing khlem sem. Ngan nym phylla ruh de lada sa ha kane ka kynti ka UDP kan hap ban nguid biang kluk ia la ka jong ka prie kaba ka dang shu dep ban khlei sarong, kaba katno tam lada sa shisien kan hap ban leit nguh leit dem bad leit pan map biang na ka NPP.
Ka dei ka jingshisha ba katba phi dang tlot phi dang swai phim dei bad ym bit ia phi, da lei lei ruh em, ba phin dait kylla ia ka kti kaba ym tang ba ka ju khyllie ban pyntian bam bad ban pyndi um ia phi hynrei kaba ju kylla thiah ban syrpai syrpud ruh ia phi. Ka dei pynban ia phi ba phin sngewthuh shwa ia la ka jong ka bor bad ruh ia la ka jong ka dor kaba shisha ka jong phi. Ngan nym phylla ruh lada kan poi pynban haduh u pud jong ka jingkad syndon arliang wak jong ka UDP. Ngan nym phylla lada na ka jinglong ‘Cabinet Minister’ phin poi pynban sha ka jinglong ‘chief opposition whip’. Ha kaba kut bad wat lada khlem ka UDP ruh ka MDA 2.0 kan skhem bad kan neh tad haduh kaba kut ki san snem. Lada ngi khoh nioh katno katno ruh ia kane ka MDA 2.0 pynban ka don jingkyrmen ba kan nang skhem bad ba kan neh tad haduh kaba kut ki san snem.
