Shillong, Jymmang 08:
U MLA ka Mawlai u Bah Brightstarwell Marbaniang u la ong ba ka Sports Policy ka shu long tang ha ki kot ki sla, hynrei khlem da lah ban pyntreikam ïa ka kumba ka dei ban long.
Ïa kine ki kyntien u la pynpaw ha ka sngi pynkut ïa ka 16th Lawei Ka Ri Sports Open Carrom Championship 2023 ba la pynlong da ka Lawei Ka Ri Sports Social and Cultural Club ha ka 6 tarik mynta u bnai ha Mawlai Mawdatbaki.
Kumba ka paw ïa ka jingpynkhreh jong ka Sports Policy la ithuh da ka Sorkar Jylla naduh u 2019, hynrei la lai snem kynthih ym pat pyntreikam pura ïa ka.
“Ngi sngewsih ban tip ba ïa Sports Policy la shu long tang ha ki kot ki sla khlem da lah ban pyntreikam ïa ka kumba ka dei ban long bad kane ka la pynduh mynsiem ïa kiba bun ki samla kiba don ïa ki sap ïalehkai bapher bapher,” u la bynrap.
“Kam don ka bhah ai kam ai jam ïa ki samla ïalehkai kiba wanrah burom ïa ka Jylla la ka long ha ki lympung ïalehkai hapoh ka ri (national level) ne wat shabar ruh kumjuh.”
U la ai jingïaroh ruh halor ka jingpynlong ïa ka North East Olympic Games 2022 ha kaba ka la ïaryngkat bad ki ri ka pyrthei. “Katno ka long kaba itynnad shisha ban peit ïa ka jingplie bad jingpynkut ïa ka North East Olympic Games, hynrei kan ym don jingmut ban shu pyni sha ka pyrthei ba ngi lah ban pynlong. Ka sorkar ka dei ban pynbiang shwa ïa ki jaka ïalehkai kiba paka khnang ba ki nongïalehkai kin ïoh ban kilan met bha ha shwa ban kin leit ïashim bynta ha kino kino ki lympung,” u la bynrap.
Kumta utei u nongmihkhmat ba dang thymmai na Mawlai u la khmih lynti ba kan wan ka jingkylla ha ki snem ki ban wan. “Nga kyrmen ba kane kam dei ban shu ïaisah sah kumne, hynrei kum ki paidbah ki la dei ban sngewthuh ba kim dei ban sngewhun khnang ban wanrah ïa ka jingkylla ha ki snem ban wan ha kaba ïadei bad ki kam ïalehkai,” la bynrap biang utei u nongmihkhmat.
