Yanaquihua, Jymmang:
Ki bor pyniaid jong ka Peru ha ka Sngi U Blei ki la iathuh ba 27 ngut ki nongbylla ki la duh ia ka jingim na ka jingkem ding ka par ksiar ha ka thaiñ South jong ka Peru. Kane ka la kylla long ruh kawei na ki jingjia ba sniewbok tam na ki par ksiar ba katei ka ri kam pat ju ioh mad mynno-mynno ruh.
Na ka liang ba ki bahaiing hasem jong kitei ki nongbylla kiba trei ha katei ka par, ki la leit mar-mar sha katei ka jaka ba katei ka par ka don, ban khmih lynti ia ka khubor shaphang ki baieid- bathoiñ jong ki, la ki dang lait im ne em na katei ka jingjia ba sngewsih.
Kumta ruh la ong ba kawei ka briew, kaba long ka kurim jong uwei na kitei ki nongtrei bylla kiba trei hapoh jong katei ka par ksiar, ha katei ka sngi ka la leit poi sha katei ka jaka, ryngkat ki ummat kthang bad ka da lynñiar bad iam pait dohnuh ruh halor katei ka jingjia, ryngkat bad ka jingkhot pyrta ia ka kyrteng u kurim jongka.
Ki pulit bad ki bor pyniaid ki la pyntikna ba katei ka ding kaba la klang ha katei ka krem La Esperanza 1 kaba don hapoh ka thaiñ Arequipa, ka dei beit namar ka jingthud jong ka bor ding ilektrik.
La ong ba katei ka jingpluh ka la nang jur hadien ba ka la ioh ban pur sha ki bynta ba dei da ka dieng kiba don hapoh jong katei ka par.
La ong ba kitei ki nongbylla ki don shapoh jong katei ka par kumba 100 meter eiei ka jing jylliew na ka jaka rung.
Kumta, ki pulit ki dang trei shitom ban lum jingtip ruh halor kito kiba iadon hapoh jong katei ka par ha ka por ba katei ka jingjia ka la jia bad kumjuh halor ka jingdon kiba khlad na katei ka jingjia ha katei ka sngi.
Shuh shuh la ong ba ki kynhun iarap ki hap ban da phikir bha ia ka jinglong jingman jong katei ka par, hashwa ba kin sei ia ka met jong kitei kiba khlad baroh.
Hadien ba la ioh ban sei noh ia ka met jong kitei kiba khlad baroh, ym shym la ioh jingtip eiei ban don kiba dang sah mynsiem ne kiba dang lait im na katei ka ding.
Hynrei ym shym la ioh jingtip shai ruh ba katno ngut ki briew ki don shapoh jong katei ka par, ha ka por ba kem ding.
Namarkata, la ong ba katei ka jingjia ha kane ka por, ka long ka jingjia kaba sniewbok tam ia ka Latin America bad ki doktor ki iathuh ba bun na kitei kiba khlad ki dei namar ka jingbym ioh shuh ia ka lyer ban ring mynsiem bad kumjuh ruh ka jingthang jong katei ka ding kaba ka khlaiñ bha.
Ia katei ka par, la pyntrei da ka Minera Yanaquihua, kaba long ka kompeni kaba la ithuh da ka sorkar hynrei ki don shibun tylli kiwei pat ki par be-aiñ kiba don ha kylleng jong katei ka thaiñ.
Katei ka kompeni ka la ju pyntrei ha kitei ki par la kumba 23 snem mynta.
Namar la ong ba ka jingtih mar poh khyndew, ka long kawei na u budlum jong ka Peru bad kaba la kynthup ruh kumba 8% na ka GDP jong katei ka ri.
Ha u snem ba la leit, 39 ngut ki briew ki la khlad ha kum kitei ki jingjia ha ki par tih mar poh khyndew ha kylleng jong katei ka ri.
Kumjuh ruh ha u snem 2020, 4 ngut ki nongbylla ki la duh ei la ka jingim hadien ba ka par kaba don ha Arequipa ka la twa hi khlem da ai ia kano kano ka dak ba kin ioh ban pynkhreh.
Ka Peru ka long ruh ka jaka pynmih kaba heh bha haba iadei bad ka jingpynmih ia ka rupa, ka tama bad kiwei de ki jait mar poh khyndew.
