Brownsville, Jymmang:
Ha kane ka jingjia la ong ba 7 ngut ki la khlad noh ha ka Sngi U Blei bad kumba katto katne ngut pat kiba mynsaw hadien ba kawei ka kali SUV ka la leit ban tynrah ia kitei ki briew katba ki dang ïeng ha ka jaka ap bos habar ka Migrant Aid Centre kaba don hapoh South Texas.
Ki bor ka aiñ ki shim ba katei ka jingjia ka long ka jingjia kaba shu jia ryngkhat, watla ki don kiba sakhi bad kiba iohi ba utei u nongñiah jong katei ka kali ha katei ka sngi, u pyrta jam da ki ktien kren beiñ pyrshah ia kitei kiba dang ïeng ap bos ha katei ka jaka, hashwa ba un leit ban rat dusmon syndon ia ki.
La ong ba katei ka kali ka la leit tur beit- beit sha kitei ki katto katne ngut ha ka por ba la iaid ka ‘Red Light’ ha ka por kumba 8:30 jong ka step Sngi U Blei, bad kane ka la jia hapoh Brownsville, kaba don ha khappud jong ka thaiñ South jong katei ka nongbah.
Ki bor pyniaid ki pyntip ruh ba kumba 10 ngut kiwei pat ki la ngat bad mynsaw lang ha katei ka jingjia.
Ka Luis Herrera, kaba long ka nongsakhi ha katei ka jingjia, ha kaba ma ka ruh ka la shah rat lang bad ka la don jingmynsaw ha ki bynta jong ka kti, ka la iathuh bakawei ka briew kaba leit rung ha katei ka kali, ka la byrngem lypa ia kitei kiba ïeng ha katei ka jaka ba kin phet na katei ka jaka.
Hadien kata la ong ba katei ka kali ka la pynher stet bha bad ka la leit suh beit-beit sha ka jaka ba kitei ki briew ki dang ia ïeng ban ap bos.
Ia mynta hi, ki pulit kim pat shym la pynpaw paidbah ia ka kyrteng jong utei u nongñiah jong katei ka kali, watla katta la ong ba kin sa pynlong da ka jingialang ba kyrpang bad ki lad pathai khubor ha kaba yn sa iakren bniah halor jong katei ka jingjia.
Kumta, ki bor pyniaid ki dang pynlong ka jingtohkit bniah halor jong katei ka jingjia, ban lap la katei ka jingjia ka long ka jingjia ryngkhat ne kaba la thmu khnang.
La ong ba ki don kumba 25 ngut eiei ki briew kiba ïeng ap bos ha katei ka jaka ïeng bos ha katei ka sngi.
