Paris, Jymmang:
Uwei na ki khlur ialehkai Tennis ka ri Bilat uba la paw bha ha ki snem ba lah leit noh bad uba lah bat teng kum u lahduh ha ka pyrthei u Andy Murray, mynta u snem u lah rah ia ka jingjop ba nyngkong naduh u snem 2019. Kane ka wan urlong hadien ba khur noh shalade ia ka thong jingjop ha ka lympung ialehkai kaba dang shu dep long ha ki khyndiat sngi ka Aix-en-Provence Challenger.
Kum ban shu pynpaw hangne ka long ba u Murray u lah iaid lynti ha ka jingim ialehkai ka jong u khlem da ioh ban rah wat tang kawei ka trophy jingjop naduh ba u lah rah ia ka ha Antwerp ha u Risaw 2019. Kumta u Murray uba shong mynta ha ka jaka ba 52, ha katei ka jingiakhun phainal ha ka lympung; u la lah ban pynliem noh ia u nongiakhun pyrshah u Tommy Paul na USA da 2-6, 6-1, 6-2.
Shuh shuh u Murray u don ruh ia ka jingthmu bad ka jingkyrmen na ka bynta ban iai pynkhlain shuh shuh ialade ha ka thup kyrdan bad ka jingpynthikna ruh halade ia ka jingioh jaka ka jong u ha ka jingpyniakab jong ka lympung ialehkai Wimbledon ha u bnai Naitung mynta u snem.
Haba phai khyndiat sha ka jingiakhun ka long ba kitei ki arngut ki ioh por tang khyndiat na ka bynta ba kin ioh pynjem khnap hapdeng jong ki ha ka tei ka lympung iakhun, bad kum ka jingpynkhreh ruh ka jong ki ha shuwa ban sdang kawei pat ka lympung iakhun Grand Slam ha Roland Garros ka French Open ha ki lai taiew ki ban wan. Shuh shuh ruh u Murray un sa leitphai biang ruh sha ka thup kyrdan ba 50 ha ka rta ba 42 snem ynda lah pyllait paidbah ia ka thup kyrdan ba thymmai.
katei ka jingjop ka jong u ka long ruh kum ka jingai mynsiem na ka bynta utei u khlur ialehkai ba Bilat, uba baroh shi katta u lah duh jingkyrmen ha kaba iadei bad ka jingialeh ka jong u ban khur ia ki trophy jingjop na ki lympung ialehkai, hadien ba u Murray u lah ngat ha kiba bun ki jingshitom bad jingmynsaw ruh kumjuh kiba lah ban ia u da bun-bun snem.
